Deputetja e Partisë Demokratike të Kosovës, Ganimete Musliu, ka kërkuar sërish sqarime se përse Prindon Sadriu, bashkëshorti i presidentes, Vjosa Osmani, ishte pjesë e aksionit ‘Defender Europe 2021’.

Ishte ministri i Mbrojtjes, Armend Mehaj, ai i cili nuk dha përgjigje për pytjen konkrete, duke thënë se për këtë çështje është komandanti i FSK-së, shkruan Reporteri.net.

“Më lejoni të ju informoj se ‘Defender Europe’, 2021 ka qenë një operacion i përbashkët i udhëhequr nga ShBA-të. Në këtë ngjarje kanë marrë pjesë 28 shtete, në mesin e tyre edhe mbi 300 ushtarë të FSK-së. Nuk po lëshohem në deklarata, sepse deklaratat e tilla e minojnë funksionin e këtij aksioni. Është komandanti ai i cili ka raportuar në Komision është deklaruar edhe para mediave, unë jam politik, ai është ushtarak”, ka thënë Mehaj.

Pas kësaj deklarate të Mehajt, ka reaguar deputetja e PDK-së, Ganimete Musliu.

Ajo kërkoi shkarkimin e menjëhershëm të ministrit të Mbrojtjes.

“Kërkojë shkarkimin e menjëhershëm të këtij ministri. Ministri i FSK-së që nuk  di kompetencat e veta. Kërkojmë shkarkimin e menjëhershëm të tij”, ka thënë ajo. /Reporteri.net