Eliminimi i Holandës është befasia e parë e madhe e Kampionatit Evropian. Parë nga perspektiva e Holandës, sidoqoftë, dikush flet për zhgënjimin.

Dhe Rud Gullit nuk hezitoi ta thotë fjalën e tij. Ish-futbollisti i Milanit, kampion evropian më 1988, kërkoi, jo shumë fshehurazi, shpjegime se pse Holanda, edhe pse luajti 11 kundër 11, nuk prodhoi thuajse asgjë për të shënuar. Pyetje retorike? Gullit synon trajnerin De Boer. Duke folur në “Bein Sport”, ai nënvizoi:

“Ky është një zhgënjim i madh. Kartoni i kuq ndaj De Ligt bëri ndryshimin. Djali goditi topin me dorë pas një ndërhyrjeje, por ndërhyrja e tij ishte e vullnetshme. Unë mendoj se dëbimi me karton të kuq ishte veprimi i duhur. Nuk arrij si ta shpjegoj që Holanda, edhe kur luhej 11 kundër 11, kishte vetëm një shans real për të shënuar me Malen. Djaloshi u lirua dhe doli një kundër një me portierin. Normalisht, një top i tillë duhej të përfundonte vetëm në portë, por portieri bëri mirë.

Në kohën e barazisë numerike, unë nuk e vura re praninë në fushë të Wijnaldum, Memphis dhe Frenkie de Jong. Në vend të kësaj, Republika Çeke luajti një lojë të guximshme. Kundërshtari nuk u dorëzua kurrë. Edhe nga pikëpamja taktike, çekët ishin pa të meta. Trajneri ynë na detyrohet më shumë se disa shpjegime. Në tri ndeshjet e para gjithçka funksionoi si duhet”.

Gullit nuk ndalet vetëm te moduli i lojës: “Nuk është vetëm çështje 3-5-2 ose 4-3-3, i cili është përdorur gjithashtu në disa raste. Personalisht nuk kam gjetur një shpjegim për ndryshimet. Të paktën krijoni një mundësi të vetme shënimi. Edhe përpara se De Ligt të dëbohej nga fusha, asgjë nuk ndodhi. Unë nuk i kuptoj pozicionet e Wijnaldum dhe Depay në fushë.

Këto zgjedhje do të kritikohen ashpër dhe mendoj se do të jetë shumë e vështirë për De Boer t’i shpjegojë ato”.