Një peshkatar 45-vjeçar dyshohet se është mbytur gjatë mbrëmjes së djeshme pasi ka dalë për të peshkuar. Mendohet se Stavri Vasilovskit i është përmbysur varka në liqenin e Prespës.

Gazetarja e Klan News, Daniela Zisi, raporton se në momentin që është përmbysur varka kanë qenë tre persona të cilët kanë dalë për peshkim, personi që dyshohet se është mbytur, vëllai i tij dhe një tjetër.

Këta të fundit kanë notuar dhe kanë shpëtuar, ndërsa viktimën dyshohet ta ketë zënë varka poshtë.

Atje pritet që të shkojnë polumbarët për të bërë kërkimet e nevojshme dhe për të kërkuar trupin e pajetë. Shërbimet e Policisë Kufitare dhe grupi hetimor ndodhen në vendngjarje ku po punohet për sqarimin e plotë të rrethanave të ngjarjes./tvklan.al/