Banorët serbë në veri të vendit kanë vazhduar të protestojnë, duke mbajtur të bllokuara rrugët që çojnë në pikat kufitare me Serbinë, në Jarinjë e Bërnjak për shkak të vendimit të sotëm të Qeverisë së Kosovës për të mos lejuar më qarkullimin me vetura me targa të Serbisë, njësoj siç vepron Serbia me targat RKS.

Protestuesit janë rigrupuar në Jarinjë dhe kanë ngritur tenda duke kaluar natën aty.

Në disa pamje të publikuara në mediat serbe, shihet se protestuesit ndezin zjarr para Policisë së Kosovës, shkruan Reporteri.net.

Në pamje ata dëgjohen edhe duke brohoritur “Kosova është Serbi”.

Ata kanë shpalosur edhe një transparent të madh ku thuhet “Mirë se vini në Asociacionin e Komunave Serbe”.

Kujtojmë se situata është përshkallëzuar dje pasi autoritetet e Kosovës nisën aplikimin e masës së reciprocitetit për targat e automjeteve nga Serbia, duke thënë se një vendim i tillë nuk është ndërmarrë kundër serbëve, por është imponuar nga Serbia.