Qytetarët të cilët përdorin gazin për gatim dhe ngrohje janë shprehur se rritja e çmimit të karburanteve është e papërballueshme.

Për ekonominë familjare të tyre kjo është një shuplakë e fortë, thonë ata. Në treg çmimi i gazit po kalon 89 lekë për litër, një vlerë e lartë kjo për niveli e pagave dhe pensioneve që trajtohen shqiptarët.

“Jemi shumë keq me ekonominë… nëse deri tani e kishim litarin në fyt, tanimë po na e shtrëngojnë litarin.”

Një reagim i tillë vjen pas shtrenjtimit të kostos së jetesës. Reaksioni zinxhiri i rritjes së çmimeve ka prekur dhe çmimin e karburanteve në vend. Gjatë muajve të verës dhe deri në shtator të vitit 2021 çmimi i gazit është rritur me mbi 60 %, e ndërsa benzina dhe nafta me mbi 10%.

Për ekonominë familjare shqiptare kjo është një shuplakë e fortë thonë qytetarët, pasi me gaz ata gatuajnë, por edhe gjatë dimrit e përdorin për ngrohje.

“Më shumë akoma, sepse edhe ngrohemi edhe gatuajmë. Çmimet janë në stratosferë. Buka u rrit, gazi u rrit, qeveria asnjë ndërhyrje nuk ka bërë. Për qeverinë dhe bashkinë janë shumë të përballueshme, po jo për popullin. Gatuajmë me gaz.”

Shporta bazë ushqimore u zbras disi thonë pensionistët dhe një rritje tjetër e çmimit të gazit për ata të cilët janë përdorues të tij për nevoja të tyre do të thotë vërtet shumë.

Pensione e rroga minimale për një ekonomi tregu me çmime të papërballueshme.

“Kujt i mjafton pensioni. Ne pensionistët nuk përballojmë asgjë.”

Çmimet e karburanteve në Shqipëri janë më të lartat në të gjithë Europën, përfshi edhe vendet shumë më të pasura të kontinentit.