Ka përfunduar Konferenca e Kryetarëve e thirrur sot nga kryetari i Kuvendit Gramoz Ruçi, ndërsa janë zbuluar edhe disa lëvizje që PS-ja do të bëjë të enjten në seancën plenare.

BalkanWeb ka mësuar detaje të reja nga mbledhja, ku pritet që seanca e së enjtes të zhvillohet me debate të forta. Diskutimet në Kuvendin e Republikës do të zgjasin rreth pesë orë.

Kjo mbledhje e Konferencës së Kryetarëve vjen një ditë pasi selia rozë deklaroi se ka nisur procedurat për të shkarkuar presidentin e vendit Ilir Meta. Gjithashtu “BalkanWeb” mëson se debati do ndahet në mënyrë proporcionale mes grupeve parlamentare dhe koha më e gjatë do i takojë grupit të PS.

Në seancën e së enjtes janë vendosur në dispozicion të maxhorancës 170 minuta, ndërsa 130 janë rezervuar për opozitën (grupin demokrat) dhe pjesa e mbetur për deputetët e pavarur.