Një i burgosur ka ndërruar jetë sot në Spitalin Rajonal të Pejës. Lajmi është bërë i ditur nga Shërbimi Korrektues, të cilët njoftojnë se personi në fjalë është  27 vjeçari me inicialet I.A, shkruan Reporteri.net.

Sipas SHKK-së, i burgosuri ishte dërguar me urgjencë  në Spitalin Rajonal të Pejës rreth orës 10:10, ku përkundër ofrimit të ndihmës mjekësore ka ndërruar jetë.

Njoftohet se I. A, ishte shtetas i Republikës së Shqipërisë, dhe ishte në vuajtje të dënimit në Burgun e Dubravës për  veprën  penale; Blerje, posedim, shpërndarje dhe shitje e paautorizuar e narkotikëve.

Shkaqet e vdekjes nuk dihen ende, ndërsa trupi i pajetë i viktimës do të dërgohet për obduksion.

Ndryshe, gjatë muajit të kaluar në Spitalin Rajonal të Pejës, kishte  ndërruar jetë edhe burgosuri, me inicialet Gj. P, i lindur më 1965.

Ai po vuante dënimin për një kohë të gjatë në Burgun e Dubravës, ndërkohë që vuante  nga sëmundja e kancerit, për çka ishte i shtrirë disa herë edhe në QKUK. /Reporteri.net