Bordi i kompanisë “MediaWorks”, pjesë e së cilës janë Gazeta Express dhe Televizioni T7, ka emëruar Drejtorin e ri të kompanisë, Leonard Kerqukin, i cili deri më tash ka ushtruar detyrën e Kryeredaktorit, njofton kompania. 

Leonard Kerquki, i cili nga viti 2010 ushtron detyrën e Kryeredaktorit të Gazetës Express e më pas edhe atë të Televizionit T7, nga sot do të jetë Drejtor i Përgjithshëm i kompanisë. Emërimi i Kerqukit vjen pas largimit së Drejtorit të deritashëm, Berat Buzhala.

Gazeta Online Reporteri.net të shtunën ka raportuar për largimin e Buzhales nga Express dhe T7, derisa ai e ka konfirmuar të nesërmen raportimin përmes një njoftimi në facebook.

Leonard Kerquki është pjesë e Gazetës Express nga tetori i vitit 2006 dhe është një prej themeluesve të Televizionit T7.

Karrierën e tij, ai e ka filluar në vitin 2004 si gazetar, kurse nga viti 2008 si redaktor i politikës në Gazetën Express. Në vitin 2010 emërohet Kryeredaktor i Gazetës Express. Në vitin 2016, Kerquki është autor dhe producent i disa emisioneve televizive që prodhonte në atë kohë mediumi.

Ai ishte autor i emisionit shumë të ndjekur “Zona Express”, me të cilin në vitin 2017 fiton edhe Çmimin e Parë të Bashkimit Europian për Gazetari Hulumtuese.

Nga viti 2018 Kerquki udhëheq emisionin “Pressing”, që sot është emisioni më i ndjekur politik në Kosovë.

Leonard Kerquki për disa vite ka qenë anëtar i Asociacionit të Gazetarëve Profesionistë të Kosovës dhe anëtar i Bordit të Këshillit të Mediave të Shkruara në Kosovë.