Ish-i burgosuri politik dhe ish-ambasadori në Tiranë, Nait Hasani ka folur për vizitën që u ka bërë ish-krerëve të UÇK-së në Hagë, Hashim Thaçin, Kadri Veselin, Jakup Krasniqin dhe Rexhep Selimin.

Ai tha se atje po gjykohet lufta jonë për liri dhe se dënimi i tyre është dënim i lirisë dhe pavarësisë sonë.

“Ne njihemi që para luftës dhe bashkë kemi qenë pjesë e luftës dhe organizimit të Ushtrisë Çlirimtare të Kosovës. Kam ndjerë dhe ndjej mallë për ta. Atje po gjykohet lufta jonë për liri. Dënimi i tyre është dënim i lirisë dhe pavarësisë sonë, i shtetit tonë dhe i aleatëve tanë”, tha ai.

Akuzat ndaj ish-krerëve të UÇK-së, Hasani i quajti të pavërteta.

“Unë i takova ata veç e veç dhe biseduam për situatat dhe gjendjen që e kanë brenda, por edhe për akuzat ndaj tyre. Asnjë vepër ne nuk e kemi bërë për ndërmarrje kriminale.Ato janë shpifje që i ka bërë Serbia dhe i ka miratuar Gjykata Speciale. Kjo tregon që është krijuar një gjendje që një ndërmarrje kriminale e ka bërë UÇK-ja ,e kjo nuk është aspak e vërtetë, është gënjeshtër”, u shpreh Hasani në Klan Kosova.

Ai tha se ish-krerët e UÇK-së në Hagë janë harruar nga institucionet.

“Ata thanë se për neve nuk është interesuar askush për një vit. Por, ata nuk mërziten, sepse ata janë të vetëdijshëm për veprën edhe punën e tyre që e kanë bërë për lirinë e Kosovës. Ata e kanë ndërtuar shtetin e Kosovës, ata janë krenarë me punën dhe veprën e vet. Ata nuk kanë bërë krime, nuk kanë bërë gjenocid, nuk kanë bërë trafikim, prandaj ata kanë luftuar për lirinë e popullit të vet, kanë luftuar për shtetin e vet, ata e ndjejnë vetën mirë edhe aty. Por, është ndjenja e fajësisë e qytetarëve dhe shtetit tonë në mbrojtjen e tyre”, u shpreh tutje Hasani.

Hasani tha se ata e ndjejnë vetën mirë dhe në aspektin shëndetësor janë mirë dhe se gjatë ditës e gjatë aktiviteteve ditore qëndrojnë së bashku.

Tutje, ai tha se ish-krerët e UÇK-së i përcjellin zhvillimet në vend dhe u bëri thirrje institucioneve të Kosovës që t’u dalin në mbrojtje ushtarëve tanë, njerëzve që kanë krijuar paqen dhe pavarësinë e vendit.