Përfaqësuesi Special i BE-së, Miroslav Lajçak, tha se dialogu nuk është i thjeshtë, se është një çështje po aq e ndjeshme për Serbinë dhe Kosovën.

Megjithatë, ai shtoi se beson se, siç thotë, shumë shpejt do të shohim rezultate konkrete.

I pyetur nga portali “Buka” i Banjallukës për dialogun ndërmjet Kosovës dhe Serbisë dhe refuzimin e Prishtinës për të formuar Asociacionin e komunave me shumicë serbe, Lajçaku tha se dialogu ishte “një çështje e ndjeshme si për Serbinë ashtu edhe për Kosovën”.

“Megjithatë, dialogu ka zgjatur për më shumë se një dekadë dhe ka sjellë një sërë zgjidhjesh konkrete dhe të mira. Dialogu nuk ka alternativë dhe është konfirmuar nga liderët e Kosovës dhe Serbisë dhe është vendimtar për normalizimin e marrëdhënieve evropiane dhe përparimin e tyre në rrugën evropiane. Ne kemi liderë me mandate të forta si në Beograd ashtu edhe në Prishtinë. Ata kanë forcën për të gjetur zgjidhje dhe ne jemi në fazën e negociatave se cila është rruga më e mirë e mundshme përpara”, tha Lajçaku.

Ai kujtoi se liderët kosovarë dhe ata serbë u takuan në qershor dhe në korrik në Bruksel dhe se, sipas tij, ata janë të gatshëm të takohen sërish.

“Ne po punojmë në atë drejtim që ai takim të nxjerrë disa vendime konkrete. Ai dialog nuk është i lehtë, por ekziston dhe besoj se shumë shpejt do të shohim rezultate konkrete”, thotë Lajçaku.

Përshkallëzimi i situatës, thotë ai, nuk është në interes të “asnjërës palë”.

“Bashkësia ndërkombëtare është e qartë kur thotë se nuk ka alternativë për dialogun dhe se nuk ka devijime. Ne presim angazhim aktiv dhe serioz si nga Serbia ashtu edhe nga Kosova. Ne kemi dokumente që thonë këtë dhe partnerët tanë janë të vetëdijshëm për këtë”, u shpreh lehtësuesi i Dialogut, Miroslav Lajçak.

I pyetur nëse rajoni duhet të jetë i lumtur apo i shqetësuar për interesin e komunitetit ndërkombëtar, duke pasur parasysh se Mbretëria e Bashkuar ka emëruar së fundmi Stuart Peachin si të dërguar special për Ballkanin, Lajçaku tha të gjithë do ta kishin më të lehtë sikur të merreshin me punët e tyre.

“Megjithatë, rajoni është mësuar me përfshirje të shtuar të komunitetit ndërkombëtar. Fatkeqësisht, ka ende nevojë për këtë. BE-ja nuk ka asnjë qëllim apo ambicie për të ‘mikro-menaxhuar’ rajonin, por prania jonë është thjesht e nevojshme”, thotë Lajçaku, duke shtuar se BE-ja është më e pranishmja në rajon sepse është investitori, partneri tregtar dhe donatori më i madh.

Sipas tij, BE-ja po investon miliarda euro në përparimin e Ballkanit Perëndimor.

“Kur flasim për angazhimin politik, do të doja të theksoja si një gjë pozitive bashkëpunimin shumë të ngushtë që kemi me Shtetet e Bashkuara dhe administratën e Joseph Bidenit. Ne me të vërtetë ndajmë të njëjtin vizion, dhe ai është Ballkani, i cili është në BE dhe ndan vlerat e tij”, tha Lajçaku, i cili konfirmoi se Gabriel Escobar dhe ai së fundmi ishin takuar me Peachin në Londër dhe gjashtë ministra të jashtëm nga rajoni.

“Mesazhi kryesor i atij takimi ishte se Ballkani Perëndimor nuk ka të ardhme përveç asaj evropiane, nuk ka agjendë tjetër përveç asaj evropiane, nuk ka rrugë tjetër për normalizimin e marrëdhënieve ndërmjet Serbisë dhe Kosovës përveç dialogut të BE-së dhe sigurisht i kemi përcjellë të dërguarit britanik Stuart Peach se ai ishte i mirëpritur t’u bashkohej atyre përpjekjeve dhe se ne të gjithë ishim në të njëjtin ekip. Peach e konfirmoi absolutisht këtë”, tha Lajçaku.