Muaj më parë Isa Agushi u largua me vetëdëshirë nga të gjitha pozitat që mbante në degën e LDK-së në Gjilan. Pas ca muajsh si asamblist i pavarur, ky i fundit është afër të bëhet me parti të re. Siç merr vesh Reporteri.net, ai është shumë pranë kalimit në Partinë Demokratike të Kosovës.

Komandanti Isa Agushi i cili në luftën e fundit në Kosovë mbante nofkën “Dardani”, ishte zgjedhur këshilltar komunal nga radhët e LDK-së në zgjedhjet e fundit. Mirëpo, më 3 prill të këtij viti ai dha dorëheqje nga të gjitha funksionet që mbante në LDK, për siç thotë ai “pakënaqësive në këtë parti”.

Reporteri ka kontaktuar me Agushin i cili nuk e ka mohuar se shumë shpejt do t’i bashkohet PDK-së. I pyetur për këtë ai ka thënë se “nuk ka përjashtime asnjë parti”.

Isa Agushi njihet si asamblisti më i pasur në Gjilan. Ai i është bashkangjitur radhëve të UÇK-së në Koshare, ku ishte disa muaj dhe ishte bashkëluftëtar i Agim Ramadanit. Më pas ishte emëruar shef i shtabit të Zonës Operative të Karadakut, me nofkën si komandant Dardani.