Presidenti i Malit të Zi, Milo Gjukanoviq edhe sot do të vazhdojë vizitën në Kosovë. Në ditën e dytë të vizitës, presidenti Gjukanoviq do të vizitojë bazën e KFOR-it dhe do të takohet dhe me përfaqësues të partive opozitare.

Gjukanoviq gjatë ditës së djeshme u prit në takim nga presidentja e vendit, Vjosa Osmani dhe kryeparlamentari Glauk Konjufca.

Në një konferencë të përbashkët për media pas takimit me homologen e tij kosovare, Vjosa Osmani Gjukanoviq tha se  e mbështesin e aplikimin e Kosovës për anëtarësim në Këshillin e Evropës, shkruan Reporteri.net.

Gjukanoviq u pyet edhe për çështjen e demarkacionit, teksa tha se kanë folur për këtë temë edhe me presidenten Osmani. Presidenti malazez përmendi marrëveshjen e nënshkruar më 2015 dhe tha se çështja e demarkacionit mund të konsiderohet problematike vetëm për dikë që dëshiron të krijojë probleme

Megjithatë, ai tha një komision i përbashkët do të shikojë për korrigjimet.

“Dua të përgjigjem drejtpërdrejt. Kemi folur për të gjitha temat, që nuk janë probleme por çështje që kërkojnë zgjidhje, edhe për çështjen e kufirit. Miqësia arrihet me vështirësi dhe kur të arrihet duhet të ruhet me kujdes. Kemi marrëveshjen e nënshkruar më 2015.

Kjo çështje mund të konsiderohet problematike vetëm për dikë që dëshiron të krijojë probleme. Ne nuk duam të krijojmë probleme. Jam i sigurtë se do tu përmbahemi dokumenteve që kemi nënshkruar dhe përmes punës së përbashkët të komisionit për demarkacion të krijojmë kushte për korrigjime për të cilat do të pajtohemi dhe që do të kontribuojnë që ky kufi të jetë i logjikshëm dhe ashtu si duhet të jetë dhe të mos shërbejë si temë për rrezikimin e marrëdhënieve tona”, u shpreh Gjukanoviq në konferencë për media.

Gjukanoviq gjatë ditës së djeshme u prit në takim edhe nga zëvendëskryeministri i Kosovës, Besnik Bislimi. /Reporteri.net