Zëdhënësja e LDK-së, Sibel Halimi ka reaguar ndaj gjuhës së përdorur nga ana e Ministrit të Financave Hekuran Murati, ndaj deputetes Vlora Dumoshi.

Halimi thotë se një gjuhë e tillë është e papranueshme dhe qasja që Murati kishte ndaj Dumoshit, sipas saj e vë në pah mendësinë e Vetëvendosjes si parti politike.

“E papranueshme gjuha e ministrit Hekuran Murati drejtuar deputetes Vlora Dumoshi. Qasja e tillë shpërfaq të vërtetën e mendësisë së partisë në pushtet karshi pjesëmarrjes së gruas në politikë. Veprime të tilla duhet të marrin fund e kërkim falja është e domosdoshme”, ka shkruar Halimi.

Në seancën e sotme të Kuvendit të Kosovës, ministri i Financave dhe Transfereve u acarua pas ndërhyrjeve të deputetes Dumoshi gjatë fjalimit të tij. Murati i kërkoi Dumoshit të ketë respekt për të tjerët brenda Kuvendit.

“E nderuar deputete kontributi i vetëm i juaj prej se ju mbaj mend është me ndërhy në fjalët e dikujt tjetër. Prej që ka fillu ky mandat, jam më se i sigurt që tash e gati një vit e gjysmë i vetmi kontribut i juaji është ndërhyrja në fjalën e tjetër kujt. Pak respekt ju lutem!”, qortoi ministri, deputeten Dumoshi.