Nënkryetarja e PDK-së, Vlora Çitaku, ka kritikuar kryeministrin Kurti për qëndrimin e tij jashtë Kosovës.

Çitaku përmes një shkrimi në llogarinë e saj në Facebook, këtë qëndrim të Kurtit në SHBA fillimisht, e më pas në Zvicër, e ka quajtur të papërgjegjshëm dhe të paprecedan, shkruan Gazeta Online Reporteri.net.

Tutje ajo ka ironizuar me vizitën e tij të fundit në një fabrikë të çokollatave në Zvicër.

“E paprecedan dhe tërësisht e papërgjegjëshme që Kryeministri në detyrë tash e tri javë është jashtë Kosovës. Sot e paska vizituar njê fabrikë të çokolladave në Zvicër, e paska bërë shqiponjën me studentët shqiptarë atje. Vizita në SHBA mund të kualifikohet si studimore, thënë më së buti. Në ndërkohë në Kosovë inflacioni ka kaluar 11%, e sot bordi i AKP-së, i zgjedhur nga Kurti paska shpallur valën e re të privatizimeve ( kujtoni pak deklaratat e Kryeministrit për privatizimin në Kosovë)”, ka shkruar ajo.

Opozita edhe në seancën e sotme të Kuvendit e ka kritikuar qëndrimin e gjatë të shefit të qeverisë jashtë Kosovës.