Diplomati Arbër Mehmeti ka përmbyllur me sukses mandatin e tij tashmë mbi 5-vjeçar në Japoni, ku ka shëbyer si i Ngarkuar me Punë i Ambasadës së Kosovës në Japoni.

Punën dhe profesionalizmin e Mehmetit e ka vlerësuar Drejtori i MPJ-së në Japoni, Hanada Takahiro, njofton Ambasada e Kosovës në Japoni, transmeton Gazeta Online Reporteri.net.

“Drejtori Hanada ka vlerësuar punën e diplomatit Mehmeti, profesionalizmin, miqësinë dhe bashkëpunimin e shkëlqyer që Ministria e Jashtme Japoneze ka pasur me Ambasadën e Kosovës përgjatë këtyre viteve.

Gjithashtu edhe Ambasadori Kiçmari duke i uruar sukses në karrierë dhe angazhimet e reja në MPJD, shprehu besimin e tij se ky mision i parë në Tokio për diplomatin Mehmeti ka vënë themele të forta dhe të qëndrueshme që z. Mehmeti të vazhdoj punën në forcimin e marrëdhënieve të Kosovës me Azinë në përgjithësi dhe me Japoninë në veçanti”, njofton Ambasada.

Diplomati Arbër Mehmeti shprehu mirënjohjen dhe vlerësimin e tij për mbështetjen e vazhdueshme që Ambasada e Kosovës në Tokio dhe ai personalisht ka pasur nga MPJ Japoneze dhe drejtori Hanada. /Reporteri.net/.