Kosova është mposhtur me rezultat 2 me 0 nga Greqia në ndeshjen e katërt në kuadër të Grupit 2 të Ligës C në Ligën e Kombeve.

Në ndeshjen që u zhvillua në Panthessaliko Stadium në Volos, Dardanët ishin në kërkim të pikëve të plota në mënyrë që ta barazonin liderin e grupit, por nuk ia arritën qëllimit.

Lojtarët e Kosovës u penguan gjatë gjithë ndeshjes me laserë nga tifozët, si dhe provokuan duke shpalosur flamuj të Serbisë ku shihej edhe harta e Kosovës.

Momenti vendimtar i gjithë takimit ishte në minutën e 70’, kur Georgios Giakoumakis shënoi për rezultatin 1-0 për grekët.

Pas golit, tifozët vendas sulmuan ‘Dardanët’ me mjete piroteknike dhe hodhën gjësende në fushën e blertë, por gjyqtari nuk pa të arsyeshme zbrazjen e tribunave apo mbylljen e parakohshme të ndeshjes.

Derisa mysafirët bënin përpjekjet e fundit për ta barazuar rezultatin, Petros Mantalos shënoi edhe golin e dytë për nikoqirët (90’+9).

Kujtojmë që Greqia është liderë e Grupit 2 në Ligën C të Ligës së Kombeve me 12 pikë, ndërsa Kosova ka gjashtë pikë pas katër ndeshjeve të zhvilluara. /Reporteri.net/.