Qytetarët e Kosovës do të vazhdojnë të jenë të izoluar kjo pasi që për liberalizmi të vizave për kosovarët nuk ishte vënë si temë në Samitin e BE-së me shtetet e Ballkanit Perëndimor që u mbajt të enjten në Bruksel.

E ambasadori shqiptar në Kosovë, Qemal Minxhozi ka thënë se Shqipëria duhet të bëjë presion tek ndërkombëtarët në mënyrë që qytetarët e Kosovës të mos jenë delja e zezë e Evropës.

“Jemi të gjithë shqiptarë. E shoh të pamundur. Duhet patjetër këmbëngulja e Shqipërisë që të shikojë mundësinë të bëjë presion te organet vendimmarrëse që qytetarët e Kosovës të mos jenë delja e zezë e Evropës, por të pajisen me pasaportën evropiane dhe të shkojnë drejt objektivave që i kanë vënë vetes”, është shprehur Minxhozi në Klan Kosova FM, shkruan Reporteri.net.

Tutje ai ka thënë se “Kosovës i takon shtetësia e saj. Kosova nuk duhet të privohet nga e drejta e saj që i takon me sjelljen e saj dhe hapave të demokratizimit. Kosova është realitet thjeshtë jo historik, por që me punën e saj e ka merituar të jetë pjesë e familjes evropiane. Kosova atë që e ka pasur para 50 vjet po i mohohet sot”.