Vrasja e trefishtë në mbikalimin e Fushë-Krujës, ku viktimë mbetën Brilant Martinaj, Diklen Vataj dhe Besmir Hoxhaj dyshohet se është kryer nga vrasës me pagesë.

Bëhet me dije se 4 autorët e ngjarjes së rëndë prej ditësh kanë survejuar dhe ndjekur lëvizjet e Martinajt.

Ndërkohë Diklen Vataj luante rolin e bodigardit të 22-vjeçarit, që dyshohet për vrasjen e dy ish-policëve, Xhulio Prelës dhe Xhelal Reçit.

Ndërkohë Hoxhaj raportohet të ketë qenë shofer në automjetin tip “VW Passat”, që dyshohet se u shkrumbua pas hedhjes së lëndës djegëse nga autorët.

Automjeti ku po udhëtonin tre persona u qëllua me rreth 50 plumba, ndërsa lëvizte në mbikalimin e Fushë Krujës, ku për pasojë dhe mori flakë.

Makina e autorëve që dyshohet të jenë katër vetë është gjetur pak pas atentatit në fshatin Larushkë.

Brenda mjetit u gjet dhe një armë zjarri automatike që dyshohet se është përdorur në krim.

Ndërkohë armë u zbuluan edhe në makinën e shkrumbuar të viktimave.