Gjykata e Apelit ka lënë në burg shtetasin turk Fatih Özer.

Jashtë kamerave, përpara trupës gjykuese, avokati i tij ka thënë se Faruku është i arsimuar dhe nuk përbën rrezik për shoqërinë. “Konstatoj se në materialet e ardhura nga autoritetet turke nuk ka vendim për aktivitete kriminale në Turqi. Kërkojmë masë sigurie detyrim paraqitjeje sa herë të kërkojë gjykata“, mësohet të ketë thënë ai.

Faruk Fatih Özer u arratis nga Turqia me 2 miliardë dollarë, të cilat i kishte fituar duke mashtruar dhjetëra mijëra turq, të cilët kishin investuar paratë e tyre në monedhën virtuale turke “Thodex”. Ai kishte mashtruar rreth 360 mijë përdorues të kompanisë së tij “Thodex”.

Faruk Ozer rezultoi të ishte futur në Shqipëri nga pika e kalimit kufitar të Rinasit më 20 prill të vitit të shkuar, ndërkohë që dolën dhe pamje filmike nga momenti kur ai u akomodua në një prej hoteleve të kryeqytetit, nga një shtetas shqiptar, i cili ka deklaruar se nuk ishte në dijeni të veprës penale që kishte kryer biznesmeni turk.

Prokuroria turke ka mbyllur në prill të këtij viti dosjen hetimore në ngarkim të bosit të kompanisë së kriptomonedhave “Thodex”, Faruk Fatih Ozer, duke e çuar atë në gjykatë. Ozer dhe tre bashkëpunëtorët e tij akuzohen se kanë ngritur një skemë mashtrimi duke futur në të dhjetëra mijëra turq që menduan të investonin në kriptomonedha përmes kësaj platforme./A2CNN