Autor: Erblina Krasniqi

Rinesa Fetahit i duhet çdo ditë të dalë jashtë objektit të Fakultetit të Filologjisë për të konsumuar një çaj, kafe apo diçka tjetër. Sikur ajo, edhe të gjithë studentët, profesorët e stafi i Universitetit të Prishtinës “Hasan Prishtina” po përballen me të njëjtën situatë. E gjithë kjo si pasojë e mungesës së bufesë në Fakultetet e UP-së që nga viti 2006.

“Kemi nevojë për një bufe, pra një vend ku mund të çlodhemi dhe të pijmë apo të hajmë diçka” – thotë Rinesa Fetahi, studente e gjermanishtes.

Prej se janë mbyllur bufetë ka pasur kërkesa për hapjen e tyre si nga studentët ashtu edhe nga menaxhmentet e fakulteteve.

Dekani i Fakultetit Filozofik, Dashamir Bërxulli, thotë se ka bërë kërkesë për rihapjen e bufesë në nëntor të vitit të kaluar. Por, kjo nuk është kërkesa e vetme që ka drejtuar udhëheqjes së universitetit.

Bërxulli thotë se më 2013 i ishte refuzuar kërkesa nga Këshilli Drejtues për rihapjen e bufesë.

Ndërkaq Sekretari i Përgjithshëm i UP-së, Besfort Krasniqi, deklarohet se së fundmi kanë diskutuar për këtë çështje.

“Është diskutuar ideja e rihapjes së bufeve nëpër fakultetet e UP-së”, tha Krasniqi.

Ai shprehu se bufetë do të funksionojnë në kuadër të hapësirave të fakulteteve pasi të jenë
zbatuar procedurat e prokurimit publik. Gjithashtu pohon se kanë pranuar edhe kërkesa për rihapjen e bufeve.

“Së fundmi një kërkesë të tillë e ka pranuar Këshilli Drejtues i UP-së nga Fakulteti Filozofik” – shtoi tutje, Krasniqi.

Ndërkohë Lindita Sejdiu-Rugova, dekane e Fakultetit të Filologjisë, thotë se nëse UP-ja nuk
lejon rihapjen e bufesë, së paku të sjellë aparate për kafe, çaj dhe ndonjë ushqim të lehtë.

Ajo shton se me këto aparate edhe studentët do të kenë më pak shpenzime, sepse çmimi i
ushqimit do të jetë më i ulët.

“Aparatura të tilla të jep çaj, kafe me çmim më të lirë se në vetëshërbim”, tha Sejdiu Rugova.

Ajo gjithashtu thotë se për këto aparatura ka bërë kërkesa disa herë në ish-rektorët e kaluar, por nuk kanë lejuar një gjë të tillë.

“Para 6 vjetëve kam kërkuar që të vendosen aparate të tilla por nuk na është lejuar”, shton tutje ajo.

Studentët, profesorët dhe punonjësit e Fakultetit të Filologjisë shprehen se iu duhet një
bufe dhe tregojnë për vështirësitë që po hasin në mungesë të saj.

Bufetë e Fakulteteve të UP-së janë mbyllur në vitin 2006, me vendim të ish Rektorit të UP-së, Enver Hasani. Ky vendim i Rektorit ka ardhur si rezultat i të të gjeturave në raportimin e zyrës së Auditimit të MASHT-it. Me datë 14.7.2006, zyra e Auditimit të MASHT-it nëpërmjet raportit me shkrim të cilin ia ka dërguar Universitetit, ka konstatuar se Fakultetet e UP-së nuk kanë pasur kontrata të vlefshme për dhënien me qera të lokaleve që janë shfrytëzuar për bufe që nga viti 2003-2004, prandaj këto bufe kanë punuar në kundërshtim me procedurat e parapara ligjore. /Reporteri.net/.

*Autorja është studente e vitit të parë në Departamentin e Gazetarisë në UP.