Pas LDK-së, edhe kryetari i PDK-së, Memli Krasniqi ka thënë se kryeministri Kurti duhet të raportojnë në Kuvend për planin e BE-së, marrëveshje kjo tashmë e pranuar në Bruksel.

Ai ka thënë se është po ashtu dita e katërt që gjithandej në Kosovë diskutohet për këtë marrëveshje dhe për pasojat eventuale që sjell ajo në mungesë të qartësimit të çdo pike të saj.

Sipas tij, një politikan i ndërgjegjshëm do të kishte shkuar vet në seancë për të raportuar, pa ndonjë mocion.

“Po flasim për një marrëveshje, preambula e së cilës e specifikon neutralitetin ndaj statusit, pra heqë dorë prej njohjes së ndërsjellë. Po flasim për një marrëveshje ku nenin 10 pa njohjen e ndërsjellë e pranon Asociacionin, në nenin 7 i jep mundësi krijimit të një sistemi autonoomist për serbët e Kosovës, e mos të flasim pastaj për nenin 11, pra për aneksin që hapë shumë e shumë pikëpyetje. Mbi të gjitha, nga ajo që kemi parë ajo marrëveshje nuk mund të hyjë në fuqi pa ardhë në Kuvendin e Kosovës për ratifikim. Nga qëllimi shtetëror për një marrëveshje finale me njohjen e ndërsjellë në qendër, ky proces ka degraduar në një marrëveshje të përkohshme me Asociacionin në qendër”

Krasniqi e cilësoi Kurtin si politikan të papërgjegjshëm që ik nga ballafaqimi me deputetët dhe tha se PDK e mbështet mocionin për debat me kusht që kryeministri të jetë i pranishëm në Kuvend.

“Sot është dita e katërt prej që kur Kryeministri i Kosovës, Albin Kurti, ka deklaruar se e pranon marrëveshjen bazuar në propozimin evropian. Është poashtu, dita e katërt që gjithandej në Kosovë, në shtëpitë tona, në familje, në studio televizive, gjithkund diskutohet për këtë marrëveshje, por poashtu diskutohet edhe për pasojat eventuale që sjellë kjo marrëveshje në mungesë të një qartësimi për secilën pikë prej saj që tashmë është bërë publike dhe zyrtare. Një politikan i përgjegjshëm do të kishte ardhur vetë pa e ftuar dhe pa bërë mocion me kërkesë të tij për t’iu drejtuar Kuvendit, përfaqësuesve të qytetarëve, por edhe gjithë popullit të Kosovës për ta njoftuar me dokumentin dhe çdo pikë që përfshihet aty. Por, Kryeministri i Kosovës nuk është këtu as sot. Unë sinqerisht nuk e kuptoj se çfarë pune më të rëndësishme ka sot Kryeministri sesa me ardhë në Kuvend për marrëveshjen të cilën ka deklaruar se po e nënshkruan me Serbinë”, tha Krasniqi.

Në seancën e sotme edhe kryetari i LDK-së, Lumir Abdixhiku ka kërkuar nga Kryeministri i Kosovës, Albin Kurti që të raportojë në Kuvend lidhur me dialogun.

Ka qenë neni 7 i propozimit evropian ai të cilin e ka përmendur kreu i LDK-së në fjalën e tij para deputetëve të Kuvendit të Kosovës, dhe siç tha ai Kurti e mbajti të fshehtë parathënien e kësaj marrëveshjeje për tejkalimin e trashëgimisë kulturore, në vend të ballafaqimit me Serbinë.

Abdixhiku kërkon që Kurti të raporojë në Kuvend për dialogun: Me një copë letër tejkaloi krimet e masakrat që ndodhën në Kosovë