Xhemile Dehari, nëna e Astrit Deharit, ka rrëfyer për momentin kur e mori vesh për herë të parë lidhur me humbjen e mostrave të Astritit.

Për të, ky lajm që tha se e dëgjoi fillimisht në televizion, ishte vdekje e dytë e djalit të tij, shkruan Gazeta Online Reporteri.net.

Ajo nuk beson që thjesht humbën mostrat, por se dikush i vodhi ato.

“Dëgjova në lajme në televizione që paskan humbë mostrat, unë po e quaj që ia vodhën gjakun, për mu personalisht ka qenë vdekja e dytë e Astritit nuk e di nëse mund të kuptohet ndryshe”, tha ajo në RTV Dukagjini.

Tutje, nëna Xhemile u shpreh e pakënaqur lidhur me ecurinë në zbardhjen e rastit.

“Tri punëtore kanë qenë dhe kanë kaluar gati tre muaj nga zhdukja e mostrave a nuk po mundet prokurori me zbulu se cila ka vjedhur gjakun dhe se pse është vjedhur, unë person i thjesht do të mundesha ta zbuloja deri më tani”, është shprehur ajo.

Zonja Dehari tutje ka rrëfyer edhe sesi disa prej punëtoreve në IML i dërgojnë sinjale duke i thënë se nuk dinë asgjë se ç’ka ndodhur me mostrat e Astrit Deharit, dhe se “janë shumë të pastërta”.

“Unë me pas qenë në vend të tyre të më humbet gjaku i dikujt kisha dhënë dorëheqje vetë por këto i kanë marrë prapë çelësat dhe bëjnë kontrollet e mostrave nuk e di unë se qysh munden. Plus më dërgojnë sinjale duke thënë se unë jam shumë e pastër, nuk e di se cila është se nuk i njohë, nëpërmjet vajzës i ka thënë se tregoj nënës tënde që unë kam punuar aty dhe se jam shumë e pastër”, ka treguar ajo.

Kujtojmë se, më 8 dhjetor, ministrja e Drejtësisë, Albulena Haxhiu, kishte njoftuar se janë zhdukur mostrat e të ndjerit, Astrit Deharit, nga laboratori i toksikologjisë.

Haxhiu kishte theksuar se në këtë vend kanë qasje vetëm 3 persona. /Reporteri.net/.

Haxhiu: Vetëm 3 persona kishin çelësat te mostrat e Deharit, përgjegjësi nuk është jashtë institutit