Autor: Rexhep Kameraj

Shtetet e Bashkuara të Amerikës s’i kanë pritur fare mirë kritikat e partive opozitare – me theks te LDK dhe PDK – mbi përmbajtjen e propozimit evropian. Me përjashtim të AAK-së, që më tepër është në një mendje me kryeministrin Kurti, dy partitë tjera të mëdha opozitare, propozimin e BE-së e konsideruan të dëmshëm për Kosovën.

Në një përgjigje ekskluzive për gazetën online Reporteri.net, ambasada amerikane në Kosovë deklaroi se janë të shqetësuar me qëndrimet e opozitës karshi propozimit evropian, që të paktën gojarisht u pranua si bazë për diskutime të mëtejshme në dialogun Kosovë-Serbi.

Nga Ambasada thanë se komentet e opozitarëve nuk përkojnë me ato të ShBA-ve.

“Jemi të shqetësuar me deklaratat e bëra nga drejtues dhe zyrtarë të partive opozitare që shprehin kundërshtimin e tyre ndaj propozimit të BE-së. Këto pikëpamje nuk përputhen me mbështetjen e ShBA-së për propozimin”, thotë zëdhënësi i Ambasadës amerikane, në përgjigje për Reporteri.net.

Për gazetën online Reporteri.net, ky zëdhënës i Ambasadës Amerikane në Prishtinë thekson se edhe Biden e Blinken e nënvizuan mbështetjen e fortë për propozimin e BE-së, për të çuar përpara Kosovën drejt stabilitetit rajonal e integrimit evropian e euroatlantik.

“Në nivelet më të larta të qeverisë, ShBA e kanë bërë të qartë këtë mbështetje. Presidenti Biden dhe Sekretari i Shtetit Blinken, në komunikimet e tyre të fundit për Ditën e Pavarësisë së Kosovës, nënvizuan se propozimi ka mbështetjen tonë të fortë dhe do ta çojë shumë Kosovën drejt stabilitetit më të madh rajonal, prosperitetit ekonomik dhe integrimit evropian dhe euroatlantik”, përfundon deklarata.

Por çka thanë liderët e opozitës, Lumir Abdixhiku i LDK-së dhe Memli Krasniqi i PDK-së, për propozimin evropian, që nxitën këtë reagim shqetësues nga ShBA-të?

Memli Krasniqi, PDK: Nga marrëveshje me njohje në qendër, në marrëveshje me Asociacionin në qendër

Kreu i Partisë Demokratike të Kosovës, Memli Krasniqi, planin evropian e konsideroi si një propozim që nuk e favorizon fort Kosovën, shkruan Reporteri.net.

Krasniqi, përmes një deklarate që e ka theksuar disa herë tashmë, ka thënë se marrëveshja e arritur në Bruksel nuk ia siguron vendit njohjen nga Serbia.

Në të kundërtën, ai konsideron se marrëveshja vendos në qendër themelimin e Asociacionit të komunave me shumicë serbe.

I njëjti ka shprehur shqetësim edhe për nenin 7 të marrëveshjes, ku flitet për “sigurimin e një niveli të duhur vetë-menaxhimi”, paragraf ky që thuajse mori vëmendjen më të madhe.

“Po flasim për një marrëveshje, preambula e së cilës e specifikon neutralitetin ndaj statusit, pra heqë dorë prej njohjes së ndërsjellë. Po flasim për një marrëveshje ku nenin 10 pa njohjen e ndërsjellë e pranon Asociacionin, në nenin 7 i jep mundësi krijimit të një sistemi autonoomist për serbët e Kosovës, e mos të flasim pastaj për nenin 11, pra për aneksin që hapë shumë e shumë pikëpyetje”, ka thënë Krasniqi në seancën e Kuvendit.

Madje, lideri i PDK-së e vuri në pikëpyetje ratifikimin e kësaj marrëveshjeje, e cila tha se nuk mund të hyjë në fuqi pa shkuar në Kuvend. Në njëfarë mënyre, si për të thënë se do ta kundërshtojë kategorikisht aty.

“Mbi të gjitha, nga ajo që kemi parë ajo marrëveshje nuk mund të hyjë në fuqi pa ardhë në Kuvendin e Kosovës për ratifikim. Nga qëllimi shtetëror për një marrëveshje finale me njohjen e ndërsjellë në qendër, ky proces ka degraduar në një marrëveshje të përkohshme me Asociacionin në qendër”, tha ai.

Lumir Abdixhiku, LDK: Me marrëveshjen në Bruksel, Kurti ia plotësoi dëshirën Serbisë

Të njëjtën ‘brengë’ me liderin e PDK-së, e ka edhe ai i LDK-së, Lumir Abdixhiku.

Lideri i Lidhjes Demokratike të Kosovës, Lumir Abdixhiku, thotë se me pranimin e propozimit evropian nga kryeministri Kurti, u vërtetuan edhe brengat e LDK-së.

Abdixhiku tha se propozimi evropian nuk është final, si dhe nuk e përmban njohjen e ndërsjellë, gjë që tha se ishte qëllimi i vetëm i Serbisë, shkruan Reporteri.net.

“Dokumenti i pranuar po ashtu parasheh implementimin e të gjitha marrëveshjeve paraprake – përfshirë dhe Asociacionin – si dhe statusin e veçantë për Kishën Ortodokse Serbe. Kryeministrit i ka mbetur vetëm ta dakordojë datën e themelimit te Asociacionit, meqë ai, me pranimin e zbatimit të marrëveshjeve paraprake, ka pranuar që ta themelojë atë”, shkroi lideri opozitar në Facebook.

Sipas Abdixhikut, dialogu tanimë ka marrë një kahje tjetër, dhe që do të vazhdojë edhe për disa vite të ardhshme.

“LDK konsideron se menaxhimi tërësisht i gabuar i procesit të dialogut nga kryeministri i Kosovës përgjatë dy viteve të fundit, ka zhvendosur procesin e dialogut nga një marrëveshje përfundimtare e ligjërisht të obligueshme në një marrëveshje bazë, pa njohje në të dhe me vazhdimësi dialoguese për vitet e ardhshme. Përfundimi në mes të zgjedhjes së një marrëveshje të tillë dhe izolimit eventual të Kosovës janë përgjegjësi e këtij kryeministri”, ka thënë ai.

Ramush Haradinaj, AAK: Marrëveshja në Bruksel, arritje e madhe

Ndryshe nga PDK dhe LDK, Aleanca për Ardhmërinë e Kosovës, me në krye Ramush Haradinajn, është rreshtuar krah kryeministrit Albin Kurti.

Marrëveshjen e arritur në Bruksel, Haradinaj nuk e sheh në dëm të Kosovës, por thotë se ia siguron Kosovës njohjen faktike nga Serbia, përcjell gazeta online Reporteri.net.

Lideri i AAK-së, këtë marrëveshje e ka quajtur ‘arritje të madhe’.

“Pajtimi për ta pranuar propozimin evropian për normalizimin e marrëdhënieve Kosovë-Serbi, është një e arritur e madhe. Marrëveshja është pranim faktik i pavarësisë së Kosovës, e cila i rikthehet normalitetit politik e të sigurisë, perspektivës integruese euro-atlantike e njohjeve te reja”, reagoi Haradinaj në Facebook.

Lideri i AAK-së i konsideroi me rëndësi të madhe edhe hapat e mëtejmë, dhe takimet që do të zhvillohen për zbatimin e propozimit.

“Po aq e rëndësishme mbetet edhe faza vijuese e bisedimeve për çështjet tjera të hapura, për të cilat dua të besoj se do te gjenden zgjidhjet më të mira, me çka do të përmbyllej edhe kapitulli i njohjes ‘de jure’ midis Kosovës dhe Serbisë!”, shkroi ai.

Në deklaratën e lëshuar për gazetën online Reporteri.net theksohet se ShBA e ka bërë të qartë se mbështet Dialogun e lehtësuar nga Bashkimi Evropian, dhe propozimin evropian për normalizim të marrëdhënieve mes Kosovës dhe Serbisë.

“Shtetet e Bashkuara e kanë bërë të qartë në mënyrë të përsëritur se ne mbështesim Dialogun e lehtësuar nga BE. Në veçanti, ne e mbështesim plotësisht propozimin e BE-së për rrugën e normalizimit të marrëdhënieve ndërmjet Kosovës dhe Serbisë. Përpjekjet tona të përbashkëta për ta çuar përpara këtë propozim kanë përfshirë konsultimet me partitë opozitare të Kosovës”, thotë deklarata.

Kujtojmë se më 27 shkurt, Kurti dhe Vuçiq janë pajtuar në Bruksel që të mos ketë diskutime shtesë në lidhje me propozimin e BE-së. /Reporteri.net/.