Kryeministri i Kosovës, Albin Kurti, në Ditën e Mësuesit, ka përkujtuar një mësimdhënës me të cilin kishte qëndruar në burgjet e Serbisë.

Duke shkuar për vizitë te familja, Kurti ndau historinë e Osman Jakupit nga Baksi, i cili tha se ishte plagosur e malltretuar në spital e burg, derisa katër familjarë ia kishin vrarë, shkruan gazeta online Reporteri.net.

“Me mësuesin Osman Jakupi nga Baksi ishim bashkë në burgjet e Serbisë. Ai ishte i plagosur e i burgosur, i malltretuar edhe në spital përveçse i torturuar në burg. Katër anëtarë të familjes i ka të vrarë gjatë luftës, e vetë mësues me ditar në dorë për 45 vjet e 5 muaj”, njoftoi Kryeministri në Facebook.

Pas tij, Kurti tregoi edhe për një takim që pati me vajzën e mësueses së tij të matematikës. /Reporteri.net/.

Postimi i plotë:

Mësuesi Osman, i plagosur e i burgosur, dhe Afërdita, vajza e mësueses Nafije

Me mësuesin Osman Jakupi nga Baksi ishim bashkë në burgjet e Serbisë. Ai ishte i plagosur e i burgosur, i malltretuar edhe në spital përveçse i torturuar në burg. Katër anëtarë të familjes i ka të vrarë gjatë luftës, e vetë mësues me ditar në dorë për 45 vjet e 5 muaj.

Ndërkaq Afërdita është vajza e vetme e mësueses sime Nafije Dobruna-Deva. Kur unë isha nxënës i fillores Afërdita ishte studente e Matematikës, pastaj ajo u bë profesoreshë në Gjimnaz e mandej Asistente në Fakultet të Ndërtimtarisë, në lëndët Matematikë I, II dhe III.

Sot, më 7 Mars, i takova për t’ua uruar Ditën e Mësuesit.