Ismet Munishi më nuk është trajner i Prishtinës. Ai është shkarkuar të hënën. Shkarkimi i tij ka ardhur një ditë pas humbjes së Prishtinës nga Malisheva (2:1).

Në njoftimin e lëshuar nga Prishtina, thuhet se Bordi i klubit ka marrë vendim të tillë për shkak të rezultateve në ndeshjet e fundit.

Munishi ishte në krye të Prishtinës para fillimit të këtij sezoni dhe nën drejtimin e tij, ekipi ka regjistruar 8 fitore, 8 barazime dhe 9 humbje, ndërsa zë vendin e katërt në tabelë me 32 pikë të mbledhura.

Munishin në postin e trajnerit, do ta zëvendësojë Debatik Curri me ndihmësit e tjerë deri në një vendim të ri.

“Bordi i FC Prishtinës ka vendosur që ta ndërpresë bashkëpunimin me trajnerin Ismet Munishi. Një vendim i tillë ka ardhur për shkak të mos arritjes së rezultateve të dëshiruara në ndeshjet e fundit. FC Prishtina e falënderon përzemërsisht Munishin për punën e bërë në skuadër. Skuadrën aktualisht do ta drejtojë trajneri Debatik Curri dhe ndihmësit e tjerë deri në një vendim të ri”, shkruan në njoftimin e klubit prishtinas.