Para pak minutash ka nisur mbledhja e Kryesisë së LDK-së e cila është thirrur për të diskutuar për mbarëvajtjen e Kuvendit Zgjedhor të kësaj partie.

Në ambientet e kësaj partie është parë duke hyrë dy nënkryetarët e LDK-së, Haki Rugova dhe Ismet Beqiri, shkruan Reporteri.net.

Mësohet se sot do të diskutohen kandidaturat e mundshme, të cilat akoma nuk janë bërë publike, ani pse disa prej tyre e kanë thënë vetë nëpër media.

Isa Mustafa do të jetë udhëheqës i kësaj mbledhjeje, e cila pritet të sjell ndonjë marrëveshje eventuale rreth kandidaturave.

Nevoja për ndonjë marrëveshje konsensuale për zgjedhjen e kryetarit ka ardhur pasi Statuti i partisë kërkon përkrahjen e gjysmës së delegatëve që një kandidat të ketë të drejtë garimi. Deri tani, asnjë nga kandidatët nuk e ka përkrahjen e 177 delegatëve.

Sidoqoftë, deri tani si kandidat të mundshëm po llogaritet kryetari aktual Isa Mustafa, Lutfi Haziri, Haki Rugova, Gazmend Muhaxhiri, Vjosa Osmani dhe Fatmir Sejdiu.

Ndryshe, LDK-ja do të mbajë Kuvendin Zgjedhor më 3 gusht, ku 354 delegatët nga të gjitha degët e partisë do të zgjedhin kryetarin dhe kryesinë./Reporteri.net