Sekretari i LDK-së, Ismet Beqiri, sërish i është kthyer retorikës së para pesë vitesh kur thoshte me ngulm se asessi partia e tij nuk bën koalicion me PDK-në, që atë kohë udhëhiqej nga Hashim Thaçi, por që më pas ndodhi e kundërta dhe u arrit koalicioni qeverisës mes këtyre dy partive.

Të njëjtën gjë po e përsërit Beqiri edhe tash kur zgjedhjet po kërkohen si zgjidhje pas dorëheqjes së Ramush Haraidnajt nga pozita e kryeministrit.

Beqiri i ka dhënë vijë të kuqe sërish PDK-së, ndërsa ia ka çelur derën për koalicione partive tjera.

“Për koalicion paszgjedhor nuk i përjashtoj as AAK, NISMA e PSD. Është bindja ime sot, edhe nesër dhe e shumicës së anëtarësisë së LDK-së, kundër një koalicioni me PDK-Në. Me diçka që kemi përvojë të keqe s’ke çka bisedon”, ka thënë Beqiri, në RTV Dukagjini, shkruan Reporteri.net.

Kujtojmë se pas lidhjes së koalicionit mes PDK-së e LDK-së më 2014, Beqiri ishte zyrtari i LDK-së që u “tall” më së shumti nga simpatizantët e këtij subjekti por jo vetëm pas huqjes së madhe se nuk do të ndodh në asnjë mënyrë një koalicion mes dy partive në fjalë. /Reporteri.net/.