Gazetari shumëvjeçar i sportit kosovar, Musa Begu është ndarë nga jeta.

Lajmin e kanë bërë të ditur familjarët e të ndjerit në rrjetet sociale.

Varrimi i të ndjerit do të bëhet sot në varrezat e fshatit Shipol të Mitrovicës nga ora 13:00.

Për vdekjen e Begut ka reaguar edhe Shoqata e Gazetarëve Sportiv të Kosovës.

SHGSK-ja me anë të një telegrami ngushëllimi ka vlerësuar lartë Begun, ndërsa ka shprehur ngushëllime për familjen e tij.

Musa Begu, ka punuar shumë gjatë në gazeta të ndryshme sportive, si Rilindja, Bota sot, Arena Sportive, Kosova Sport, Tribuna sportive.

“Shoqata e Gazetarëve Sportivë të Kosovës, me pikëllim të thellë mori lajmin e hidhur, për ndarjen nga jeta të gazetarit shumëvjeçar të sportit, Musa Begu. Mitrovica dhe mbarë Kosova do ta kujtojë gjithmonë me respekt jetën dhe veprën e këtij kolosi dhënë gazetarisë sportive. Musa Begu ka qenë edhe anëtar nderi i Shoqatës së Gazetarëve Sportivë të Kosovës si dhe është nderuar me çmimin për “Vepër Jetësore” nga SHGSK-ja” – thuhet në reagimin e SHGSK-së.