Sekretari i Aleancës për Ardhmërinë e Kosovës, Besnik Tahiri, i ka replikuar Kadri Veselit përmes një postimi në Facebook, duke i thënë se Kosova kurrë nuk ka pasur dhe as nuk do të ketë kryeministër me qira.

Përveç pozitës së kryeministrit, Tahiri ka thënë se as Republikën nuk e kemi me qira, e madje as territorin.

“Kosova nuk është vend me qira. As Republikën nuk e kemi me qira. Territorin nuk e kemi me qira. Me qira nuk e kemi askënd në Kosovë. Ramush Haradinaj është kryeministër i mandatuar në mënyrë demokratike, me marrëveshje demokratike, me votim demokratik i Qeverisë së vendit. Kosova kurrë nuk do të ketë Kryeministër me qira”, ka shkruar Tahiri.

Kryetari i PDK-së, Kadri Veseli, më herët gjatë ditës në një intervistë deklaroi se “dy herë e kemi dhënë kryeministrin me qira”.