Ministri i Brendshëm, Xhelal Sveçla ka dhënë detaje për arrestimet e fundit në veri të vendit, dhe sot të një të dyshuari për sulmet ndaj pjesëtarëve të KFOR-it gjatë muajit të kaluar.

Sveçla ka thënë se po mbrëmë, 15 deri në 20 persona kanë rrahur dy të rinj shqiptarë. Ai e ka quajtur këtë akt të papranueshëm teksa ka bërë të ditur se institucionet përkatëse janë angazhuar për identifikimin dhe kapjen e tyre, shkruan gazeta online Reporteri.net.

Ai thotë se qytetarët tanë në veri, ata shqiptarë, por edhe ata serbë në vazhdimësi janë terrorizuar nga aktet e bandave të ndryshme kriminale.

“Bandat kriminale në veri të vendit tonë ndër vite kanë ushtruar terror mbi qytetarët tanë përmes akteve të tyre të ndryshme kriminale.

Qytetarët tanë, veçanërisht ata shqiptarë, janë dëbuar nga shtëpitë e tyre, ata që kanë qëndruar janë rrahur, maltretuar e terrorizuar në vazhdimësi nga këto grupe kriminale. Shumë prej tyre janë larguar nga aty pikërisht për shkak të këtij terrori të ushtruar sistematikisht nga struktura kriminale me urdhër nga Beogradi. Akte të njejta kanë ndodhur edhe ndaj qytetarëve të etnisë serbe të cilët kanë njohur dhe kanë bashkëpunuar me institucionet tona.

Mbrëmë, 15 deri në 20 persona kanë rrahur dy të rinj shqiptarë. Ky akt, si çdo tjetër është i papranueshëm dhe organet tona janë të angazhuara që sulmuesit të sillen sa më parë para drejtësisë”, shkruan Sveçla.

Ai thotë se pndëshkueshmëria dhe amnistia ndër vite e kriminelëve të tillë, ka rezultuar me sulme brutale ndaj KFOR-it nga të cilat mbi 30 pjesëtarë mbetën të lënduar më 29 maj të muajit të kaluar.

“Në anën tjetër, Policia e Kosovës sot ka arrestuar Nenad Orlovic, i njohur me nofkat “Nemac” dhe “Rusi”, i cili dyshohet për sulm ndaj KFOR-it në ditën e 29 majit në Zveçan ku mbeten të plagosur shumë ushtarë. Pandëshkueshmëria dhe amnistia ndër vite e kriminelëve të tillë, ka rezultuar me sulme brutale ndaj KFOR-it nga të cilat mbi 30 pjesëtarë mbetën të lënduar. Secili që ka organizuar dhe ka qenë pjesë e atyre sulmeve do të sillet para drejtësisë.

Republika nuk trembet. Secili do të japë llogari për secilin krim. Do të vazhdojmë pa u ndalur, në luftë ndaj të gjitha bandave që kanë për synim terrorin ndaj qytetarëve tanë e destabilizimin e vendit tonë”, ka shkruar Sveçla. /Reporteri.net/