Një 23-vjeçar, i cili ishte shpallur në kërkim ndërkombëtar nga Italia është arrestuar ditën e sotme në Pukë.

Policia bën me dije se në kuadër të operacionit policor të koduar “Verdikti”, ka rënë në pranga shtetasi S.M. pasi akuzohet për organizim të emigracionit të paligjshëm në kuadër të një grupi kriminal.

Mësohet se i riu do të ekstradohet drejt Italisë.

Si rezultat i kërkimeve të mbështetura nga inteligjenca policore, për lokalizimin, kapjen dhe arrestimin me qëllim ekstradimin, të shtetasve të kërkuar ndërkombëtarisht për vepra të ndryshme penale, specialistët për Hetimin e Krimeve të Komisariatit të Policisë Pukë, falë bashkëpunimit me FAST Albanian dhe me Interpol Tiranën, kanë organizuar dhe finalizuar operacionin policor të koduar “Verdikti”, në kuadër të të cilit, u lokalizua dhe u arrestua provizorisht shtetasi S. M., 23 vjeç, banues në fshatin Blerim, Fushë Arrëz.

23-vjeçari ishte shpallur në kërkim ndërkombëtar, sepse Gjykata e Triestes, Itali, ka lëshuar urdhër arresti për të, për veprat penale “Emigracioni i paligjshëm” dhe “Pjesëmarrja në grup kriminal’’, të parashikuara nga Kodi Penal i Italisë.