Kryeministri i Shqipërisë, Edi Rama, i është kundërpërgjigjur Kryeministrit të Kosovës, Albin Kurti lidhur me deklaratën e tij të mbrëmshme për propozimin e Ramës, i cili dje në një konferencë për media tha se “Veriun e Kosovës duhet ta marrë nën kontroll KFOR”, pas sulmit terrorist ndaj Policisë së Kosovës, ku u vra polici Afrim Bunjaku.

Rama ka thënë se këtë kërkesë e ka bërë edhe Presidentja Vjosa Osmani, pa treguar se ku e ka shtruar këtë kërkesë e para e vendit, shkruan Gazeta Online Reporteri.net.

Për propozimin e tij, Rama tha se ka komunikuar në nivelet më të larta të aleancës euro-atlantike dhe se ka gjetur gatishmëri maksimale, derisa deklaratën e tij e ka mbështetur duke thënë se “KFOR-i është NATO dhe jo një forcë pushtuese për llogari të Serbisë, e as një fuqi ndarëse e territorit të Republikës së Kosovës, po përkundraze një garanci shumë e madhe në çdo rast kërcënimi!”.

“Unë e thashë qartë dje se këtë kërkesë e ka bërë edhe Presidentja Osmani dhe e shpjegova më tej se kjo që kërkoj sot nuk ka lidhje me atë çka kam shprehur disa muaj më parë, si frikë se mund të ndodhë nëse situata degradon, në mungesë të rezultateve të dialogut. Sepse, siç e shpjegova edhe dje, “nuk jemi akoma aty” dhe që të mos shkohet nesër deri aty, duhet që KFOR-i të marrë në kontroll  veriun një orë e më pare”, ka shkruar Rama në platformën X.

Rama ka pasur edhe disa fjalë për ata që e kanë sulmuar në rrjete sociale, që ka thënë se janë “politikanë me profile publike apo me profile fallco në Prishtinë”.

“E di çdokush të vërtetën e thjeshtë fare se në çdo rast dhe për çfarëdo nevoje të re operacionale në territorin e Kosovës, KFOR-i i harmonizon veprimet e veta me autoritetet shtetërore të Kosovës e me forcat e sigurisë së Republikës së Kosovës, prandaj është sa e dhimbshme, aq edhe qesharake, që edhe në këtë situatë kaq serioze për sigurinë në veriun e Kosovës, politikanë me profile publike apo me profile fallco në Prishtinë merren me të tilla manipulime të ulëta emocionesh të qytetarëve të tyre, duke deformuar qëllimisht qëndrimet e mia. Keqardhje për ta, se për trimat e biznesit politik e mediatik të Tiranës, që janë gati t’ia venë zjarrin vetë Kosovës, bashkë me Shqipërinë për përmbysjen imagjinare të “regjimit” tim, nuk kam asnjë sekondë për të humbur!”, ka shkruar tutje Rama.

Në kuadrin e mbështetjes së Shqipërisë për garantimin e sigurisë në veriun e Kosovës dhe marrjen e kontrollit nga KFOR-i, në këtë fazë kur rreziku i përshkallëzimit të konfliktit është alarmant, kemi komunikuar në nivelet më të larta të aleancës euro-atlantike e kemi gjetur një…

— Edi Rama (@ediramaal) September 29, 2023

Ndryshe, kryeministri i Kosovës, Albin Kurti, është pyetur nga media boshnjake “Istraga” lidhur me propozimin e Ramës, ku ka deklaruar se kudo në shtetin tonë e para përgjigjet policia e pastaj KFOR e EULEX.

Gjithashtu Kurti është shprehur se “kemi nevojë për patrulla të përbashkëta të policisë sonë dhe KFOR-it në kufirin mes Kosovës dhe Serbisë”, dhe kjo “formulë nuk duhet ndryshuar”.

“Për propozimin e kryeministrit shqiptar Edi Rama që KFOR-i të marrë kontrollin e veriut të Kosovës: “Ne kemi nevojë për patrulla të përbashkëta të policisë sonë dhe KFOR-it në kufirin mes Kosovës dhe Serbisë. E për sa i përket gjërave të tjera, kjo tashmë është vendosur. Kudo në Kosovë – e para që përgjigjet është policia jonë, pastaj EULEX-i dhe më pas KFOR-i. Dhe nuk mendoj se kjo formulë duhet ndryshuar”, ka thënë Kurti për “Istraga”.

Rama tha se KFOR duhet ta marrë nën kontroll Veriun, vjen përgjigja e Kurtit