Arsenali nuk i ka punët kurqysh, kjo nëse i besohet statistikave të kundërshtarit të radhës që është Liverpooli, më saktësisht treshja Mane, Firmino dhe Salah.

Liverpooli dhe Arsenali luajnë derbin e javës së tretë këtë fundjavë, ndërsa skuadra e Unai Emeryt do të përballet me tre ‘përbindësha’, shkruan Reporteri.net

Treshja sulmuese e Liverpoolit kanë arritur t’i shënojnë Arsenalit një ‘kamion’ me gola në kompeticione të ndryshme.

Futbollisti më produktiv është braziliani, Roberto Firmino i cili ka shënuar hiç më pak se 8 gola kundër ekipit të Emery, ai madje ka dhënë edhe 3 asiste tjera.

Në anën tjetër, senegalezi Mane ka regjistruar hiç më pak se 5 gola e 3 asiste kundër ‘The Gunners’, për të mos folur për Mo Salah i cili ka arritur të shënojë në çdo lojë.

Bazuar në këto statistika, Arsenali bën mirë mos të paraqitet fare kundër ekipit të Klopp, i cili po kalon në momente fantastike me klubin, prej se e mori 4 vite më parë.

Pasi fitoi kundër klubit të Norwich në xhiron hapëse, Klopp fitoi edhe Superkupën e Evropës kundër Chelseat, ndërsa e mposhti edhe Southamptonin në xhiron e dytë të Premierligës.

Të njëjtën gjë do të përpiqet ta bëjë edhe ndaj skuadrës së trajnerit Emery i cili veçse kishte thënë se nuk do të dëshironte të përballej kurrë me Liverpoolin./Reporteri.net/