Policia qëlloi dhe plagosi rëndë një grua me hixhab në një stacion metroje në Paris të martën në mëngjes, bënë të ditur mediat lokale, pasi udhëtarët raportuan se ajo “sillej në një mënyrë kërcënuese”.

“Nga frika për sigurinë e tyre, agjentët e policisë përdorën armët e tyre”, tha një zëdhënës i policisë për Reuters.

Zëdhënësi nuk mund të thoshte se çfarë në sjelljen e gruas “plotësisht të mbuluar” në stacionin Bibliotheque Nationale de France i kishte shtyrë oficerët ta qëllonin atë.

Shërbimi zjarrfikës, i cili ofroi kujdes urgjent për gruan, tha se ajo u godit nga një plumb në bark. Ajo u transferua në një spital aty pranë, tha një zëdhënës i brigadës së zjarrfikësve.

Transmetuesi BFM TV dhe gazeta e përditshme Le Parisien cituan më herët burime policore duke thënë se sjellja e gruas tregonte një motivim të mundshëm “terrorist” islamik.

Ndërkaq, një burim policor i tha Associated Press se ata hapën zjarr pasi gruaja nuk iu përgjigj paralajmërimeve të tyre.