Gjithsej 31 foshnja neonatale janë evakuuar nga spitali Al-Shifa në Gazën veriore së bashku me gjashtë punonjës shëndetësorë dhe 10 anëtarë të familjes së stafit, konfirmoi të dielën Drejtori i Përgjithshëm i Organizatës Botërore të Shëndetësisë (OBSH), Dr. Tedros Adhanom Ghebreyesus.

Tedros tha në një postim në X se foshnjat “shumë të sëmura” u dërguan në Maternitetin e Emirateve në Rafah, në Gazën jugore, ku “ata po marrin kujdes urgjent në njësinë e kujdesit intensiv neonatal”.

“Misione të mëtejshme janë duke u planifikuar për të transportuar urgjentisht pacientët e mbetur dhe personelin shëndetësor jashtë spitalit Al-Shifa, në pritje të garancive për kalim të sigurt nga palët në konflikt”, shtoi ai.

Më herët, një burim i qeverisë egjiptiane i tha CNN se më shumë se dy duzina foshnjash neonatale ishin evakuuar nga Al-Shifa.

Shoqata e Gjysmëhënës së Kuqe të Palestinës tha të dielën se ekuipazhet e saj të ambulancës, duke punuar së bashku me OBSH-në dhe Zyrën e Kombeve të Bashkuara për Koordinimin e Çështjeve Humanitare (OCHA), “ishin në gjendje të evakuonin 31 foshnja të parakohshme nga spitali Al-Shifa”.

Izraeli bastisi spitalin më të madh të Gazës të mërkurën, ku mijëra palestinezë të zhvendosur ishin strehuar së bashku me pacientët dhe stafin mjekësor.

Mjekët që janë ende në spital nuk mund të trajtojnë pacientët për shkak të bombardimeve të forta javën e kaluar. Mungesa e karburantit dhe mungesa e energjisë elektrike do të thotë se ata nuk ishin në gjendje të përdornin inkubatorë për foshnjat. Pacientët e ICU dhe disa foshnja neonatale në Al-Shifa kanë vdekur ditët e fundit.

Izraeli pretendon se Hamasi po e përdor kompleksin spitalor për qëllime ushtarake dhe ka ndërtuar një qendër komandimi nën objekt – pretendime të refuzuara në mënyrë të përsëritur si nga Hamasi ashtu edhe nga zyrtarët e spitalit. CNN nuk i ka verifikuar pretendimet as të Izraelit dhe as të Hamasit.

Mbi 11.500 palestinezë janë vrarë, sipas të dhënave të paraqitura nga autoritetet shëndetësore palestineze. Edhe 2.700 të tjerë janë raportuar të zhdukur dhe të cilët besohet se kanë mbetur të bllokuar nën rrënoja. Në shifrat e viktimave, të paraqitura nga autoritetet shëndetësore në Gazë, nuk bëhet dallimi midis civilëve dhe luftëtarëve të Hamasit. Izraeli ka thënë se ka vrarë mijëra luftëtarë të Hamasit.

Ndërkaq, afër 1.200 persona janë vrarë në Izrael, shumica civilë, gjatë sulmeve të 7 tetorit të Hamasit. Hamasi po ashtu ka kapur pengje afër 240 persona. Ushtria izraelite ka thënë se gjatë luftës i janë vrarë 52 ushtarë.