Deputetja nga Lista Guxo, Jeta Statovci, ia ka lënë meritat edhe këshilltarit të jashtëm, Gani Jakupi, për lejimin e qytetarëve të Kosovës të hyjnë në Spanjë.

Ajo tha se “qenka e mundur të paguhesh nga vendi e t’i shërbesh njëmend atij”, duke akuzuar opozitën për “ngritje në këmbë” kundër Gani Jakupit.

“Dikur projekte lobuese milionëshe për ndarjen e Kosovës, sot projekte lobuese për bashkim të Kosovës së pandarë me perëndimin. Opozita, që dikur paguante për projektin e ndarjes së Kosovës, u ngrit në këmbë për pagesën ndaj Gani Jakupit që lobon e ndihmon Republikën në Spanjë. Por, sot pas këtij lajmi a thua çfarë do të thonë. Pra, qenka e mundur të paguhesh nga vendi e t’i shërbesh njëmend atij. Ja një pjesë e rezultatit. Vazhdojmë!”, ka shkruar ajo.

Sot zëvendëskryeministri Besnik Bislimi ka njoftuar se Spanja tashmë ka njohur pasaportat e Kosovës dhe do të lejojë qytetarët e Kosovës të udhëtojnë në këtë vend pa viza.

Spanja ishte i vetmi vend që edhe pas vendimit të BE-së për heqjen e regjimit të vizave ndaloi hyrjen për kosovarët me arsyen se nuk i njeh pasaportat e Kosovës.

Besnik Bislimi jep lajmin: Spanja njeh pasaportat e Kosovës