Franca ka përfshirë në Kushtetutë të drejtën për abort, duke u bërë shteti i parë në botë teksa ky vendim është cilësuar si historik nga grupet për të drejtat e grave dhe është kritikuar shumë nga grupet kundër abortit.

Të drejtat e abortit pranohen në Francë më shumë sesa në Shtetet e Bashkuara dhe në shtete tjera. 80 për qind e francezëve kanë përkrahur faktin se aborti është i ligjshëm, raporton Reuters.

“Po dërgojmë mesazh te të gjitha gratë: trupi ju përket juve dhe askush nuk mund të vendosë për ju”, ka thënë kryeministri Gabriel Attal në fjalimin e tij para senatorëve, përcjell gazeta online Reporteri.net.

Gratë kanë pasur të drejtën e abortit në Francë me anë të ligjit të vitit 1974.

Mirëpo vendimi i Supremes në SHBA për të zhbërë ligjin “Roe v. Wade” që njihte të drejtën kushtetuese të grave për abort, kishte nxitur aktivistët që të njëjtin hap ta bënte edhe Franca.