Iraku ka njoftuar se do ta mbyllë hapësirën ajrore të vendit përkohësisht.

Autoriteti i Aviacionit Civil i Irakut njoftoi të shtunën se hapësira ajrore e vendit do të mbyllet përkohësisht për të gjithë avionët që hyjnë, nisen dhe kalojnë, duke filluar nga ora 23:30 me orën lokale deri në orën 5:30 të mëngjesit të së dielës.

Mbyllja është një masë paraprake që synon të garantojë sigurinë e aviacionit civil brenda hapësirës ajrore të Irakut.

Autoriteti tha se vendimi pason një vlerësim të plotë të rrezikut të kryer nga autoritetet irakiane dhe shtoi se mbyllja mund të zgjatet bazuar në zhvillimet e mëtejshme në rajon.

Hapësirën ajrore ka njoftuar se do ta mbyllë edhe Jordania.

Sistemet mbrojtëse të SHBA-së janë në rajon dhe mund të ndihmojnë në mbrojtje kundër sulmeve të Iranit, raporton CNN.

Irani ka kërcënuar me hakmarrje kundër Izraelit për një sulm në konsullatën iraniane në Siri më 1 prill, në të cilin u vranë shtatë anëtarë të Gardës Revolucionare, duke përfshirë dy gjeneralë dhe duke shkaktuar frikë se një klimë tashmë e paqëndrueshme në Lindjen e Mesme, me Izraelin dhe Hamasin në Gaza në luftë, shpejt mund të zgjerohet më tej. /Reporteri.net/