Kryesia e PDK-së dhe kolegjiumi i kryetarëve të degëve kanë mbajtur një takim dhe janë shprehur të vendosur për t’i dhënë fund keqqeverisjes nga kryeministri Albin Kurti.

Kryetari i Partisë Demokratike të Kosovës, Memli Krasniqi, ka zhvilluar të enjten takime të ndara me kryesinë e partisë dhe me kolegjiumin e kryetarëve të degëve të PDK-së, ku temë diskutimi ishin zhvillimet e fundit politike në vend.

Krasniqi ka shprehur keqardhjen e tij për humbjen e mundësisë për shpërndarjen e Kuvendit dhe shpalljen e zgjedhjeve të parakohshme, pasi thirrja dhe propozimi i PDK-së për koordinim mes partive më të mëdha politike lidhur me këtë proces nuk e ka gjetur mbështetjen e nevojshme.

“Kryetari Krasniqi ripërsëriti se Partia Demokratike e Kosovës e ka dëshmuar seriozitetin e saj për t’i dhënë fund keqqeverisjes aktuale dhe se vazhdon të jetë e gatshme për cilindo variant që do të mundësonte zgjedhje të parakohshme. Deri atëherë, Partia Demokratike e Kosovës do të vazhdojë të jetë zëri më i fuqishëm opozitar në vend”, thuhet në një njoftim të PDK-së.

Duke theksuar se Kosovës i duhet një Qeveri kredibile, e përgjegjshme dhe kompetente, që në qendër e vendosë interesin qytetar, Krasniqi tha se PDK e ofron alternativën më të mirë për qytetarët e vendit, përmes vizionit dhe programit të kandidatit të PDK-së për kryeministër, Bedri Hamza.