Edhe pse ishte në kërkim nga policia për ngjarjen e një viti më parë në ish-bllok ku mbeti i vrarë truproja i Ervis Martinajt, ish-polici Santiago Malko punonte si inspektor pyjesh.

26-vjeçari u ekzekutua me 10 plumba në atenatin që iu bë mbrëmjen e 27 gushtit në rrugën “Xhanfize Keko” në kryeqytet. 10 ditë pas kësaj ngjarje zbulohen detaje të reja për ish-policin.

Në xhepin e tij grupi hetimor ka gjetur një kartë e cila e identifikonte atë si Inspektor pranë Inspektoratit të Mjedisit dhe Pyjeve. Ditën e vrasjes, Malko ka qenë në krye të detyrës.

kandali thellohet më tej po t’i referohemi skedës së 26-vjeçarit. Në kërkim nga policia prej një viti, ai vijonte të punonte në administratë. Ngjarja e 4 tetorit 2018 dhe shpallja në kërkim policor nuk e kishte penguar atë që të vijonte punën.

Mësohet se emri i Malkos është hequr nga Inspektorati i Mjedisit është bërë dy ditë pas vrasjes. Ky skandal që përfshin Inspektoriatin e Mjedisit dhe Pyjeve, por edhe Policinë e Shtetit, e cila nuk ka bërë verifikimet për Malkon dhe pozicionin e tij të punës në administratë, përkon me largimin nga detyra të kryeinspektorit, Armando Lamaj.

Ky i fundit dyshohet se i ka ofruar mbrojtje Malkos gjatë kohës që ishte në kërkim policor, duke e mbajtur në detyrën e inspektorit pyjor. Santiago Malko u tërhoq nga policia e shtetit në vitin 2016 pas një sherri me vëllezërit Edmond e Gentian Lashi, pronarë të një pike bastesh sportive.