Prokuroria Speciale e Republikës së Kosovës ka ngritur aktakuzë kundër tetë personave që dyshohen për vepra penale që ndërlidhen me korrupsionin, raporton Gazeta Online Reporteri.net.

Në një komunikate për media, PSRK njofton se H.H., L.M., A.J., Xh.L., B.P., D.K., G.Sh., dhe V.M., me dyshimin e bazuar mirë akuzohen se kanë  kryer veprën penale “Keqpërdorim i pozitës apo autoritetit zyrtar”.

Ndërkaq i pandehuri H.H. ngarkohet edhe me akuzën për kryerjen e veprës penale “Lidhja e Kontratës së dëmshme”.

“Prona e cila është objekt i akuzës, bazuar në Kërkesën e Prokurorisë, është sekuestruar nga Gjykata dhe në bazë të Aktakuzës, PSRK i ka propozuar Gjykatës që ta konfiskojë atë dhe e njëjta t’i kthehet sërish pronës publike”, thuhet në komunikatë.