Kryeministri i Republikës së Kosovës, Albin Kurti, ka përkujtuar masakrën në familjen Bala në Pejë, ku pjesëtarët e forcave serbe vranë pesë fëmijë mbrëmjen e 12 qershorit të vitit 1999, raporton Gazeta Online Reporteri.net.

Përmes një postimi në faqen zyrtare në Facebook, Kurti ka ndarë pamjet nga vizita që kreu në familjen Bala, teksa ka rrëfyer detajet për masakrën e fëmijëve të moshave nga 5 deri në 12-vjeçare. Po ashtu në mesin e të vrarëve ishte edhe nëna e dy prej fëmijëve, Vjollca 28-vjeçare.

“Teksa drita e lirisë po agonte në Kosovë, në errësirën e natës forcat e Serbisë po kryenin masakra.

Në ditën e çlirimit të Kosovës, në mbrëmjen e 12 qershorit 1999, në Dardani të Pejës u vranë 5 fëmijë.

Pjesëtarët e forcave serbe hynë me dhunë në dhomat ku po flinin fëmijët. I mblodhën të gjithë anëtarët e familjes Bala në një dhomë.

I vranë motrat Nita dhe Rina (5 dhe 6 vjeçare) bashkë me nënën Vjollcën (28 vjeçare). Vëllai i vogël Rroni (4 vjeçar) ishte fshehur pas nënës së tij Vjollcës. Kur kishin filluar të shtënat ai ishte alivanosur. Pasi ishte zgjuar, kishte shkuar te dhoma e gjyshes Mahije, që ishte e paralizuar. Ishte fshehur nën këmbët e saj. Të atin, Musën (31 vjeç) e kishin rrëmbyer me dhunë. Pesë ditë më vonë, më 17 qershor 1999,  ai u gjetë i vrarë, i gjymtuar nga torturat.

Më 12 qershor u vranë edhe Agoni (6 vjeçar), Dardanja (11 vjeçare) dhe Hajriu (12 vjeçar). Nëna e tyre, Halisja, u mbijetoi nëntë plumbave në trup. Mbijetoi edhe Isa me të birin Vetonin (8 vjeçar)”, shkroi ai.

Më tej kryeministri Kurti ka theksuar se askush nuk është dënuar e as gjykuar për këtë masakër, teksa ka shtuar se nuk mund të harrohen vuajtjet dhe qëndresa e popullit.

“Askush nuk është dënuar, e as gjykuar për këtë masakër.

Në dhomën e ditës janë ende gjurmët e krimit të asaj nate. Në jetën e familjes Bala janë të përjetshme gjurmët e asaj masakre. Sikurse vrimat e plumbave në muret e shtëpisë, të hapura janë plagët në zemër.

Në këtë ditë të shënimit të një çerekshekulli të çlirimit të Kosovës, përkujtojmë të gjithë fëmijët e vrarë gjatë luftës në Kosovë. Plagët e hapura të familjes Bala dhe të gjitha familjeve që kanë humbur të dashurit e tyre kërkojnë drejtësi. Këto krime nuk mund të mbeten të pandëshkuara.

Nuk mund të harrohen vuajtjet e qëndresa e popullit. Shumë gjak është derdhur e shumë jetë janë dhënë për lirinë që e gëzojmë sot. Falë kësaj sakrifice, brezat tani rriten të lirë. Po rriten me lirinë edhe tre fëmijët e Vetonit. Vajza mbanë emrin e hallës së vrarë, Dardane.

I përjetshëm qoftë kujtimi për të gjithë martirët e dëshmorët që u flijuan për liri!”, shkroi më tej Kurti.