×
  • Lajme
  • Botë

    Valë përvëluese e të nxehtit në Greqi, regjistrohen temperatura deri në 44 gradë celcius

    Reporteri
    14 Qershor 2024 | 12:30
    Foto: AP/Petros Giannakouris

    Temperatura ekstreme, pluhuri saharian dhe lagështia e lartë përfshinë Greqinë në valën e parë të të nxehtit që nga fillimi i vitit, që e bëri qershorin në këtë vend më të nxehtin që nga viti 2007.

    Edhe pse për ditën e sotme parashikohen temperatura deri në 40 gradë, ditën e djeshme termometri në disa pjesë të vendit ka kaluar 44 gradë. Kushtet më të rrezikshme të nxehtësisë kanë mbizotëruar në Atikë, pra në zonën e Athinës, ku janë shënuar temperatura mbi 40°C.

    Sipas të dhënave nga rrjeti i stacioneve automatike të motit meteo.gr dhe Observatori Kombëtar i Athinës, temperatura maksimale më e lartë është regjistruar në Vukoljes në zonën e Chanias në Kretë dhe ka qenë deri në 44.5 gradë Celsius. Më pas është qyteti i Kranidës, ku temperatura më e lartë e matur ishte 43.9°C, transmeton gazeta online Reporteri.net.

    Në media u publikuan pamje, ku në orën 21:00 me orën lokale, plazhet në të gjithë vendin ishin ende plot me njerëz që kërkonin freskim nga vapa.

    Ministri përgjegjës për mbrojtjen civile, Vasilis Kikiljas, paralajmëroi rrezikun e zjarrit për shkak të kombinimit të temperaturave të larta dhe erës.

    Kopshtet dhe shkollat ​​fillore janë mbyllur në kufijtë administrativë të Athinës.

    Ministria e Punës ka urdhëruar gjithashtu ndalimin e plotë të punës fizike jashtë orës 12:00-17:00. “Në rast të mosrespektimit të këtyre rregullave shqiptohet gjobë prej 2000 euro për punonjës”, paralajmëroi Pavlos Marinakis, zëdhënës i Qeverisë.

    Punonjësit e qeverisë u urdhëruan të punonin nga shtëpia ditët e mëparshme, ndërsa Akropoli, vendi antik më i njohur i kryeqytetit, mbeti i mbyllur nga ora 12:00 deri në orën 17:00.

    Të gjitha vendet e tjera arkeologjike në Athinë u mbyllën gjithashtu gjatë asaj periudhe. /Reporteri.net/

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2025. Të gjitha të drejtat e rezervuara.

    Linku i lajmit u kopjua!