Artistja Lady Gaga ka kënduar një këngë franceze kabaresh afër katedrales Notre-Dame, një shtëllungë gjigante me ngjyrë të kaltër, të bardhë dhe të kuqe është parë mbi urën kryesore të lumit Sena, dhe një burrë me krahë fluturues ka luajtur fizarmonikë në nisjen e ceremonisë hapëse të Lojërave Olimpike Verore në Paris.

Një flotë anijesh i kanë bartur gati 7.000 atletë rreth gjashtë kilometrave të lumit, nën ritmet e këngës së Lady Gagas.

Duartrokitje të mëdha janë dëgjuar për ekipin e Greqisë – i cili është gjithmonë i pari – dhe e njëjta atmosferë ka vazhduar për secilën anije tjetër që ka bartur ekipet e vendeve prej gjithë botës.

Fontanat kanë lëshuar ujë në mes të Senës, teksa anijet kanë lundruar me atletët që kanë mbajtur flamujt e vendeve të tyre.

Ceremonia ka nisur me një material të incizuar, në të cilin shihet ylli francez i futbollit, Zinedine Zidane duke vrapuar nëpër Paris për të dorëzuar flakën olimpike.

Policia është e angazhuar në secilën qoshe të Parisit, pasi të gjithë sytë e botës janë në Francë.

Kjo është hera e parë që ceremonia do të mbahet në ambient të hapur.

Kosova këtë vit përfaqësohet me nëntë sportistë: pesë xhudistë, një boksiere, një sportiste në atletik dhe dy notarë.

“Jemi shumë të lumtur, kjo ndodh në herë në jetë”, ka thënë 17-vjeçarja, Elise Boukorrass, për agjencinë e lajmeve Reuters.

Moti nuk ka qenë në anën e organizatorëve, pasi reshje shiu ka pasur kohë pas kohe.

“Shiu nuk ma ndal festën në Olimpiadë – sporti është gjithçka për mua dhe do të bëj gjithçka që ta shoh ceremoninë”, ka thënë 20-vjeçarja, Flavia Merluzzi.

Lojërat Olimpike Parisi do të përfundojnë më 11 gusht.

Ndërkaq, presidentja Vjosa Osmani është lajmëruar në faqen e saj në Facebook, pak minuta para nisjes së ceremonisë hapëse të Lojërave Olimpike që po mbahen në Paris.

Osmani i ka ofruar mbështetje ekipit të Kosovës, për të cilin ka thënë se është më i miri nga të gjitha ekipet që po marrin pjesë, shkruan Reporteri.net.

“Pritet për 30 minuta me fillu ceremonia e lojërave olimpike këtu në Paris. Jemi këtu për t’i dhënë gjithë mbështetjen e nevojshme ekipit të Republikës së Kosovës, ekipit më të mirë nga të gjitha ekipet që po marrin pjesë në lojërat olimpike. Një ekip i jashtëzakonshëm, i përgatitur, që kanë punuar ditë e natë që të na përfaqësojnë në mënyrën më të mirë të mundshme.  Jam e bindur që do të jetë një ceremoni për ta mbajtur mend”, ka thënë Osmani.