Donald Trump e ka pranuar ftesën e Mbretëreshës Elizabeth për të bërë një vizitë shtetërore në Britani në qershor, duke u bërë presidenti i tretë i SHBA-së që i është dhënë nderi nga monarku, tha të martën Pallati Buckingham.

Udhëtimi ka gjasa të shkaktojë debate, pasi shumë britanikë nuk e pëlqejnë Trumpin dhe i refuzojnë politikat e tij për çështje të tilla si emigracioni.

Protestat që përfshinë dhjetëra mijëra demonstrues e mbajtën në hije një vizitë të Trump në Britani, korrikun e kaluar dhe organizatorët thanë se po planifikonin një “demonstrim të madh” kundër vizitës së tij shtetërore.

Trump dhe gruaja e tij Melania do të vizitojnë Britaninë nga 3-5 qershori, tha pallati, duke shtuar se hollësitë e mëtejshme do të shpalleshin në kohën e duhur.

Vizitat shtetërore zakonisht janë çështje të fryra edhe mediatikisht, që paraqesin një udhëtim me karroca të hapura në kryeqytet, Londër dhe një banket në Buckingham Palace.

“Mbretëria e Bashkuar dhe Shtetet e Bashkuara kanë një partneritet të thellë dhe të qëndrueshëm që rrënjoset në historinë tonë të përbashkët dhe interesat e përbashkëta”, tha Maj në një deklaratë.

Kryeministrja, e cila po përballet me thirrjet për dorëheqjen e saj nga disa ligjvënës në Partinë e saj Konservatore, të cilëve nuk u pëlqen trajtimi nga ana e saj e daljes së vendit nga Bashkimi Evropian, do të shpresojë për mbështetje të fortë për një marrëveshje tregtie pas Brexit, mes SHBA-ve dhe Britanisë.

Vizita shtetërore do të ishte një mundësi për të forcuar lidhjet tashmë të ngushta në fusha të tilla si tregtia, investimi, siguria dhe mbrojtja, tha ajo.