EMA për vaksinën Johnson & Johnson: Lidhje të mundshme me mpiksjen e gjakut

Ekziston një lidhje e mundshme mes vaksinës me një dozë të vetme të Johnson & Johnson dhe rasteve shumë të rralla të mpiksjes së gjakut. Ky është konkluzioni nga Agjencia Evropiane e Barnave të njoftuar në deklaratën e ditës së sotme. Megjithatë EMA thekson se përfitimet e vaksinës vazhdojnë të tejkalojnë rreziqet.


Komiteti i sigurisë i EMA-s tha se mpiksjet serioze të gjakut duhet të renditen si efekte anësore shumë të rralla të vaksinës.

Rregullatori i ilaçeve në BE shqyrtoi tetë raporte nga Shtetet e Bashkuara të rasteve serioze të mpiksjes së gjakut të lidhur me nivele të ulëta të trombociteve të gjakut, njëra prej të cilave ishte fatale tek një paciente që kishte bërë vaksinën.

Më shumë se shtatë milion njerëz në SHBA kanë marrë vaksinën Johnson & Johnson. Qendrat për Kontrollin e Sëmundjeve dhe Administrata Amerikane e Ushqimit dhe Barnave njoftuan pezullimin për vaksinimin javën e kaluar mbi raportet e mpiksjes së gjakut.

Të gjitha rastet e rralla të mpiksjes së gjakut kanë ndodhur tek personat nën moshën 60 vjeç; shumica e tyre gra.

Rastet ishin të ngjashme me ato të lidhura edhe me vaksinën AstraZeneca, deklaron EMA. Të dyja vaksinat janë krijuar duke përdorur një vektor adenovirus.

“Kombinimi i raportuar i mpiksjes së gjakut dhe trombociteve të ulëta të gjakut është shumë i rrallë dhe përfitimet e përgjithshme të vaksinës COVID-19 Janssen (Johnson & Johnson) në parandalimin e COVID-19 tejkalojnë rreziqet e efekteve anësore”.

Punonjësit e shëndetësisë dhe ata që kanë marrë vaksinën duhet të jenë të vetëdijshëm për simptomat e mundshme të këtyre mpiksjeve të rralla të gjakut. Ato përfshijnë gulçim, dhimbje kraharori, ënjtje në këmbë, dhimbje barku, dhimbje koke, vizion të paqartë ose njolla të vogla gjaku nën lëkurë.