Pastrimi i shtëpisë është misioni i përditshëm i çdo amvise. Megjithatë, ndonëse shtëpia mund të duket e pastër, në të gëlojnë bakteret.

Një hulumtim i kohëve të fundit, zbuloi se në një shtëpi mund të gjenden lehtësisht plot 340 baktere të ndryshme.

Kuzhina
Kuzhina, ose vendi ku përgatitet dhe gatuhet ushqimi përmban më shumë baktere se në çdo vend tjetër të shtëpisë. Më shumë se 75 përqind e sfungjerëve për larjen e enëve përmbajnë jo vetëm salmonelë por edhe E.coli. Sipas disa të dhënave frigoriferi, lavamani, banaku dhe dërrasa për prerje janë më të ndoturit. Ndërrojini sa më shpesh.

Si të mbani kuzhinën të pastër
Përdorni disinfektues për dorezat, frigoriferin dhe banakun. Sfungjerët larës ngrohini në mikrovalë për një minutë që të shkatërroni bakteret. Zhytini ato në një enë të mbushur me zbardhues të përqendruar. Ndërroni peshqirët disa herë në javë. Lajini duart përpara dhe pasi të keni prekur ose përpunuar ushqim.

Dorezat dhe çelësat e dritës
Të gjitha dorezat e dyerve apo dollapëve si dhe çelësat e dritës janë të ndotur. Njerëzit mendojnë se vetëm doreza e derës së banjës është më e ndotura, por gabohen. Çelësi i dritës së banjës, dera e frigoriferit, dera e sobës dhe e mikrovalës janë disa prej zonave më të ndotura të shtëpisë. Ato duhet t’i pastroni me lecka disinfektuese.

Tualeti
Banja është vendi ideal për rritjen dhe shumimin e baktereve. Lagështia që çlirohet gjatë dushit shtron terrenin për këto mikroorganizma. Jini të vëmendshëm ndaj dorezës së dushit, kanalit kullues, rubinetit, dyshemesë përreth WC-së, peshqirëve dhe furçës së dhëmbëve. Sipërfaqja e banjës dhe dorezat duhen fërkuar me disinfektues të paktën një herë në javë. Për këtë mund të përdorni një furçë të vjetër dhëmbësh, me të cilën mund të pastroni në imtësi piletën e dushit apo rubinetin. Peshqirët duhen ndërruar të paktën dy herë në javë ndërsa furça e dhëmbëve çdo tre muaj.

Lavatriçja
Nëse lani rroba në lavatriçe dhe nuk i nxirrni menjëherë, atëherë duhet të dini që i gjithë kazani i lavatriçes është i mbushur me baktere. Rrobat duhen nxjerrë menjëherë nga lavatriçja, sepse nëse ato qëndrojnë më shumë se 30 minuta, atëherë më mirë lajini sërish. Përdorni disinfektues për lavatriçen dhe ambientin përreth saj.

Dhoma e ndenjes
Pulti i televizorit, tastiera e kompjuterit, telefoni, tableti e të tjera janë pajisje që përdoren bashkarisht nga e gjithë familja. Ekspertët thonë se tastiera është shpesh e mbushur me myk apo stafilokok. Divanët dhe tapetet e ndryshme mund të kenë aq shumë pisllëk sa edhe rruga mund të jetë më e pastër thonë profesionistët.

Sendet personale
Atletet, çanta e palestrës, kufjet e shumë prej pajisjeve të përditshmërisë sonë janë gjithashtu të mbuluara nga bakteret dhe myku. Pajisjet më të ndotura janë celulari, çelësat, lekët, portofoli dhe pjesa fundore e çantës e cila vihet gjithnjë në sipërfaqe të ndotura. Të gjitha këto pajisje mund të pastrohen me lecka disinfektuese./Agroweb