Prezantuesja e lajmeve lokale, Olivia Jaquith, vazhdoi me një transmetim lajmesh tre-orësh në mëngjes edhe pasi filluan kontraksionet e lindjes dhe i plasën ujërat, duke i mbajtur shikuesit të informuar rreth lindjes së fëmijës së saj të parë.

“Kemi disa lajme të fundit këtë mëngjes — fjalë për fjalë,” tha bashkë-prezantuesja Julia Dunn në krye të transmetimit të CBS6 Albany të mërkurën në mëngjes. “Olivias i kanë plasur ujërat dhe ajo po e drejton lajmin tani në lindje aktive.”

“Lindje e hershme, lindje e hershme”, u përgjigj Jaquith, e cila kishte dy ditë që kishte kaluar datën e lindjes.

Jaquith qëndroi në transmetim ndërsa Dunn vazhdonte të regjistronte në Facebook Live.

“Jam e lumtur që jam këtu dhe do të qëndroj në tavolinë për aq kohë sa të mundem”, tha Jaquith. “Por nëse zhdukem, kjo është ajo që po ndodh.”

Jaquith kishte mundësinë të shkonte në shtëpi, por ajo i tha Times-Union se vendosi ta kalonte kohën në punë sesa “të priste me nervozizëm në spital”.

“Të kesh gjithë ekipin e mëngjesit pranë meje që bënte shaka më ndihmoi t’i kaloja kontraksionet shumë më lehtë”, tha ajo në një mesazh për gazetën.

Lindja e djalit të saj, Quincy, u njoftua të enjten. /Reporteri.net/