Rrjeti social “Threads” ka njoftuar se do të mundësojë dërgimin e mesazheve direkte (DM) për të gjithë përdoruesit e rritur, pas një periudhe testimi. Fillimisht, mesazhet mund të dërgohen vetëm tek ata që ju ndjekin ose tek përdoruesit me ndjekës të përbashkët në Instagram.

Megjithatë, formimi i grupeve në biseda ende nuk është i mundur, por është një funksionalitet që është në zhvillim. Këto kufizime e mbajnë Threads ende të varur nga Instagrami, megjithatë paraqesin një hap përpara krahasuar me përdorimin e inbox-it të Instagramit për Threads.

Fillimisht, drejtuesit e Meta, përfshirë kreun e Instagramit, Adam Mosseri, ishin kundër mundësisë së mesazheve direkte në Threads. Megjithatë, pas rritjes së platformës, tashmë me mbi 350 milionë përdorues, Meta ka vendosur të rishikojë qëndrimin e saj dhe të ndryshojë drejtimin.

Me këtë hap, Meta po e pozicionon Threads gjithnjë e më shumë si një alternativë për X (ish-Twitter), duke i dhënë prioritet bisedave dhe përmbajtjes në kohë reale.

Përveç mundësisë së mesazheve direkte, Threads ka shtuar edhe funksionin “highlight”, i cili shfaq trendet aktuale në aplikacion, duke e bërë përdorimin më të angazhuar dhe interaktiv.