Deputetja Donika Gërvalla, i ka quajtur “humbës” partitë tjera pasi u dështoi propozimi që votimi për kryeparlamentar në Kuvend të bëhet në mënyrë të fshehtë.

Ajo ka akuzuar PDK-në, LDK-në, AAK-në për bllokadë, duke përmendur këtu edhe Listën Serbe.

“Bllokada vazhdon. PDK, LDK, AAK dhe Lista Serbe, të gjithë së bashku, kundër votimit të fshehtë për Kryetar të Kuvendit, si mundësi për zhbllokim të proceseve. Mes tyre dhe Listës Serbe unitet i plotë, ndaj deputetëve të tyre mosbesim total. Humbës të dobët”, ka shkruar Gërvalla.

VV-ja në seancën e sotme konstituive, të nëntën me radhë, propozoi që  në Kuvend votimi për kryeparlamentar të bëhet me votë të fshehtë, por nuk nuk mori votat e mjaftueshme që ta kalojë këtë propozim që nga partitë tjera u konsiderua si arbitrar dhe në kundërshtim me rregulloret e Kuvendit.

Partia Demokratike e Kosovës Lidhja Demokratike e Kosovës dhe AAK-ja dolën kundër ndryshimit të formës së votimit për Kryeparlamentar. Kundër doli dhe Lista Serbe. Asnjëra nga këto parti s’kanë propozuar anëtarë Komisioni.

Seanca është shtyrë për të shtunën, më 3 maj. /Reporteri.net/